कारची काच फोडून चोरट्याने १ लाख १० हजार केले लंपास

पैठण : पैठण तालुक्यातील पाचोड येथे अज्ञात चोरट्याने कारची काच फोडून कारमधील १ लाख १० हजार रुपये लंपास केल्याची घटना गुरुवारी दुपारी घडली. यासंदर्भात पाचोड पोलीस ठाण्याचे सहाय्यक पोलिस निरीक्षक शरदचंद्र रोडगे यांनी आरोपीचा शोध सुरू केला आहे.

याबाबत मिळालेली माहिती अशी की, तालुक्यातील पाचोड येथील बुलढाणा अर्बन बँकेच्या शाखेत काशिनाथ बाबुराव हिंगले (रा. लिमगाव ता. पैठण) यांनी आपल्या घरगुती कारणासाठी गुरुवारी पाचोड येथील बुलढाणा अर्बन बँकेच्या शाखेत सोन्याचे दागिने तारण ठेवून १ लाख १० हजार रुपये रोख रक्कम घेऊन ती आपल्या कारमध्ये ठेवली. त्यानंतर ते मित्राच्या कामासाठी एस.बी.आय बँकेच्या शाखेत गेल्याची संधी साधून अज्ञात चोरट्याने कारची काच फोडून वाहनात ठेवलेले पैसे लंपास केले.

सदरील घटनेची माहिती पाचोड पोलीस ठाण्याचे सपोनि शरदचंद्र रोडगे यांना मिळाल्याने त्यांनी तात्काळ पोलीस पथकासह घटनास्थळ दाखल होऊन चोरट्याचा शोध सुरू केला. सदरील गुन्ह्याची माहिती मिळताच पैठण उपविभागीय पोलिस अधिकारी डॉ.सिद्धेश्वर भोरे यांनी घटनास्थळाची पाहणी करून आरोपीला अटक करण्यासाठी विशेष सूचना दिल्या. या घटनेविषयी पाचोड पोलीस ठाण्यात तक्रार दाखल दाखल करण्यात आली आहे.