चांदवड तालुक्यातील 1 लाख 9 हजार शिधापत्रिका धारकांची इ केवायसी पूर्ण, काेणत्याही शासकीय धान्य दुकानात इ-केवायसी करण्याचे आवाहन‎

तालुक्यातील १ लाख ७५ हजार २६८ व्यक्ती इ-केवायसी करण्यासाठी पात्र होते. त्यापैकी १ लाख ९ हजार ८२८ व्यक्तींनी इ-केवायसी पूर्ण केली आहे. अद्याप ६५ हजार ४४० व्यक्ती इ-केवायसी करण्याच्या बाकी आहेत. त्यामुळे प्रत्येक व्यक्तीने शासकीय धान्य दुकानात जात इ - पॉस मशीनद्वारे इ-केवायसी पूर्ण करावी असे आवाहन तहसीलदार मंदार कुलकर्णी यांनी केले आहे. केंद्र व राज्याच्या योजनांचा लाभ घेण्यासाठी शिधापत्रिकेतील सदस्यांची माहिती ग्राह्य धरली जात आहे. त्यामुळे शासनाच्या निर्देशांनुसार शिधापत्रिकाधारक व कुटुंबीयांची इ-केवायसी करण्याच्या सूचना देण्यात आल्या आहेत. त्यानुसार पुरवठा विभागाकडून सर्व शिधापत्रिकाधारकांसह कुटुंबातील प्रत्येक व्यक्तींची आधारकार्डनुसार माहिती संकलित केली जात असून ती अद्ययावत करण्यात येत आहे. तालुक्यात शिधापत्रिका धारकांच्या कुटुंबातील १०० टक्के व्यक्ती शिधापत्रिकांना आधार जोडणीचे काम सुरू आहे. याअंतर्गत इ-केवायसी अर्थात ग्राहकांची माहिती शिधापत्रिकेला जोडणी केली जात आहे. त्यात आधार, हात व बोटांचे ठसे घेतले जात आहे. संबंधित शिधापत्रिकाधारक ज्या रेशन दुकानातून धान्य घेतो, त्याच दुकानदारामार्फत इ-केवायसी केली जात आहे. यातून बनावट शिधापत्रिकेस आळा बसणार आहे. पुरवठा विभागांतर्गत शासनाच्या विविध योजनांमधून अन्नधान्य मिळवण्यासाठी तसेच इ-शिधापत्रिका काढण्यासाठी ऑनलाइन नोंदणी करणे बंधनकारक करण्यात आले आहे. त्यामुळे तालुक्यात रेशनधान्य दुकानावर शिधापत्रिका इ- केवायसी करण्याचे काम युद्धपातळीवर सुरू आहे. ज्या लाभार्थ्यांची इ-केवायसी पूर्ण झाली नाही त्यांना आगामी काळात धान्य मिळण्याची शक्यता नसल्याचे सांगितले जात आहे. ^रेशनधारक ग्राहकांनी दिलेल्या आधारकार्डनुसार त्याची ऑनलाइन पडताळणी केली जात आहे. इ - केवायसी केल्यानंतर शिधापत्रिका अद्ययावत होते. ही माहिती अद्ययावत नसल्यास संबंधित लाभार्थ्यांना पुढील काळात धान्य बंद होणार आहे. तालुक्यातील शिधापत्रिका धारकांनी आधार जोडणीसह हातांचे ठसे संबंधित स्वस्त धान्य दुकान किंवा शक्य त्या रेशन दुकानात द्यावेत. तालुक्यातील सर्व नागरिकांनी ज्या दुकानात शक्य होईल तिथे इ-केवायसी करावी. -पवन सूर्यवंशी, पुरवठा निरीक्षण अधिकारी, चांदवड