चालकाचा खून करून मारेकरी 48 तास मृतदेह ट्रकमध्ये घेऊन फिरले:धुळे-सोलापूर महामार्गावरील आडगाव बुद्रुक येथे सापडला बेवारस ट्रक

धुळे-सोलापूर महामार्गावरील ट्रकमध्ये चालकाचाच मृतदेह ट्रकच्या केबिनमधील टूलकिटच्या जागेत कुजलेल्या अवस्थेत मिळाला. त्यानंतरदेखील ट्रक काही ठिकाणी दिसून आला. त्यामुळे चालकाचा खून करून आरोपीच ट्रकमध्ये मृतदेह घेऊन फिरत होते, असा प्राथमिक संशय व्यक्त करण्यात येत आहे. ही घटना महामार्गावरील आडगाव बु. या ठिकाणी बुधवारी (२२ जानेवारी) पहाटे चार वाजेच्या सुमारास उघडकीस आली. चिकलठाणा पोलिसांनी घटनास्थळी धाव घेत मृतदेह ताब्यात घेत घाटी रुग्णालयात हलवला. विजय मुरलीधर राऊत (५२, रा. शाहूनगर, केडगाव, अहिल्यानगर) असे मृत ट्रकचालकाचे नाव आहे. या प्रकरणाचा पुढील तपास चिकलठाणा पोलिस करत आहेत. शरीरावर इतरत्र कुठेच नाही, फक्त डोक्यावर ११ वार विजय यांच्या डोक्यावर ११ वार आहेत. या वारात डोक्याची कवटीदेखील फुटली आहे. प्रत्यक्षदर्शींच्या माहितीनुसार, डोक्यात खोलवर जखमा आहेत. गाडीच्या जॅकसाठी वापरण्यात येणाऱ्या पान्याच्या साहाय्याने हे वार झाले असल्याची शक्यता आहे. त्यांच्या शरीरावर इतरत्र कुठेही मोठ्या जखमा अथवा शस्त्राने वार झालेले निशाण दिसून आलेले नाहीत. नेमके काय घडले? मागील तीस वर्षांपासून राऊत ट्रक व्यवसायात आहेत. चालक ठेवण्याऐवजी ते स्वत:च ट्रक चालवून मालाची नेआण करत. सहा दिवसांपूर्वी ते मध्यप्रदेशच्या रायपुर येथील औद्योगिक वसाहतीमध्ये माल पोहोचवण्यासाठी एकटेच गेले होते. तेथून त्यांना अहिल्यानगरसाठी लोखंडी सळ्या पोहोचवण्याचे कंत्राट मिळाले. त्यामुळे रविवारी ते तेथून माल घेऊन निघाले. मंगळवारी मध्यरात्री मात्र त्यांच्या संघटनेच्या एका ट्रक चालकाला राऊत यांचा ट्रक (एम एच १७ - बीडी - ५१६६) छत्रपती संभाजीनगरलगत जाणाऱ्या धुळे-सोलापूर या महामार्गावरील झाल्टा परिसरात उभा दिसला. त्याने गावाकडील अन्य संघटनेच्या सदस्यांना तत्काळ ही बाब कळवली. संघटनेच्या सदस्यांनी शहरातील काही ट्रक व्यवसायिकांना घटनास्थळी जाऊन पाहणी करण्यास सांगितले. ते मध्यरात्री २ वाजता आडगाव परिसरात पोहोचले. ट्रकमधून मात्र मोठ्या प्रमाणात दुर्गंधी येत होती. चालकाच्या कॅबिनमधूनच दुर्गंधी येत असल्याने त्यांनी टुलबॉक्स उघडला. तेव्हा टुलबॉक्समध्ये राऊत यांच्या चेहऱ्यावर क्रुर पध्दतीने वार करुन हत्या केलेला फुगलेल्या अवस्थेत मृतदेह आढल्याने सर्वांना धक्काच बसला.