दिल्लीत एका विचारधारेचा पराभव, प्रतिक्रियेसाठी फोन करु नका:अंजली दमानियांचे दिल्ली निकालानंतर ट्विट

27 वर्षांनंतर भाजप दिल्लीत पुनरागमन करत आहे. तर आपचे अरविंद केजरीवाल आणि सिसोदिया यांचा पराभव झाला आहे. यावर राजकीय वर्तुळाततून संमिश्र प्रतिक्रिया येत आहे. या निकालावर बोलताना सामाजिक कार्यकर्त्या अंजली दमानियांनी एका विचारधारेचा पराभव झाला अशी पोस्ट X वर केली आहे. दरम्यान दिल्ली विधानसभेच्या 70 जागांसाठी झालेल्या निवडणुकीत उपमुख्यमंत्री अजित पवार यांच्या पक्षाचा मोठा पराभव झाला आहे. दिल्लीत अजित पवार यांच्या राष्ट्रवादी काँग्रेस पक्षाने 30 उमेदवार उभे केले होते. या सर्व उमेदवारांचे डिपॉझिट जप्त झाले आहे. पक्षाला या निवडणुकीत केवळ 0.03 टक्के मते मिळाली आहेत. एकाच टप्प्यात झालेल्या दिल्लीतील मतदानानंतर आज निकाल जाहीर झाले आहेत. दमानियांचे ट्विट काय? अंजली दमानिया यांनी ट्विट करत म्हटलंय की, आज आम आदमी पार्टीचा पराभव झाला. एका विचारधारे चा पराभव झाला. माध्यमांना विनंती की कृपया मला प्रतिक्रिया देण्यासाठी फोन करू नये. मी ह्या विषयी बोलणार नाही, असे म्हटले आहे. त्या आम आदमी पार्टींच्या महाराष्ट्र निमंत्रक म्हणून काही दिवस कार्यरत होत्या. 2014 मध्ये त्यांनी नागपूर लोकसभा मतदारसंघात नितीन गडकरी यांच्याविरोधात निवडणूक लढवली होती. यानंतर त्यांनी पक्षाला सोडचिठ्ठी दिली. भाजपच्या मतांच्या टक्केवारीत 9% पेक्षा जास्त वाढ गेल्या निवडणुकीच्या (2020) तुलनेत भाजपने आपल्या मतांच्या टक्केवारीत 9% पेक्षा जास्त वाढ केली. त्याच वेळी, 'आप'ला 10% पेक्षा जास्त नुकसान सहन करावे लागले आहे. काँग्रेसला एकही जागा मिळणार नसली तरी, त्यांना त्यांच्या मतांचा वाटा 2% ने वाढविण्यात यश आले. मुस्लीम समाज कधीच भाजपला मतदान करत नाही- नितीन राऊत मुस्लीम समाजाने आपल्याला मतदान केले समजून भाजपने आपली छाती फुगवू नये, असा टोला काँग्रेस नेते नितीन राऊत यांनी दिल्ली निकालावरुन टोला लगावला आहे.मुस्लीम समाज कधीच भाजपला मतदान करत नाही, मुस्लीम समाजाने स्वत:चा आणि कुटुंबाचा जीव वाचावा म्हणून हे केले. नितीन राऊत पुढे बोलताना म्हणाले की, मी काल दिल्लीत होता, सरकारी जमीनीवर अतिक्रमण करत झोपड्या टाकण्यात आल्या. मुस्लीम समाजाच्या मोठ्या प्रमाणात अशा झोपडपट्या आहेत. या लोकांना पैसे दिले गेले पोलिसांनी त्यांना मारहाण केली, त्यांना घरे पाडण्याची धमकी देण्यात आली.