दोन प्रसिद्ध अभिनेत्रींचा एक सुखद योगायोग…; रसिका आणि ऐश्वर्या पुन्हा प्रेक्षकांच्या भेटीला

‘कलर्स मराठी’वर आजपासून मराठी कलाविश्वातील हरहुन्नरी अभिनेते अशोक सराफ यांची ‘अशोक मा.मा.’ आणि ‘पिंगा गं पोरी पिंगा’ या दोन नव्या मालिका प्रेक्षकांच्या भेटीला येत आहेत. दोन्ही मालिका वेगळ्या धाटणीच्या असूनही या मालिकांची प्रेक्षकांमध्ये कमालीची उत्सुकता आहे. या मालिकांची एक खास गोष्ट म्हणजे या दोन्ही मालिकेत ‘कलर्स मराठी’च्या माध्यमातून छोटा पडदा व्यापून टाकणाऱ्या रसिका वाखारकर आणि ऐश्वर्या शेटे या अभिनेत्री महत्त्वाच्या भूमिकेत झळकणार आहेत. या दोन्ही अभिनेत्रींच्या याआधी ‘पिरतीचा वनवा उरी पेटला’ आणि ‘रमा राघव’ या मालिका एकत्रच सुरू झाल्या होत्या. या दोन्ही मालिका चांगल्याच गाजल्या.

आता पुन्हा एकदा रसिकाची ‘अशोक मा.मा.’ आणि ऐश्वर्याची ‘पिंगा गं पोरी पिंगा’ या मालिका एकत्रच सुरू होत आहेत. हा नक्कीच एक सुखद योगायोग आहे. आता पुन्हा एकदा छोटा पडदा गाजवायला दोन्ही अभिनेत्री सज्ज आहेत. ‘पिंगा गं पोरी पिंगा’ ही मालिका प्रेक्षकांना आजपासून संध्याकाळी 7:30 वाजता पाहायला मिळणार आहे. तर ‘अशोक मा.मा.’ ही मालिका प्रेक्षकांना रात्री 8:30 वाजता ‘कलर्स मराठी’वर पाहायला मिळणार आहे.

रसिका वाखारकर हिने तिच्या या नव्या मालिकेबद्दल प्रतिक्रिया दिली आहे. ऐश्वर्या आणि माझी ‘कलर्स मराठी’वर याआधी ‘रमा राघव’ आणि ‘पिरतीचा वनवा उरी पेटला’ या मालिका एकाचदिवशी सुरू झाल्या होत्या. आता दुसरी मालिकासुद्धा एकाचदिवशी सुरू होणार आहे हा खरोखरच एक कमालीचा योगायोग आहे. आणखी एक भारी गोष्ट म्हणजे अगदी विरुद्ध स्वभावाचे पात्र आम्ही या दुसऱ्या मालिकेत साकारणार आहोत, असं रसिका म्हणाली.

ऐश्वर्या शेटे हिने देखील तिच्या भूमिकेबद्दल माहिती दिली आहे. रसिका माझी खूप जवळची मैत्रिण आहे असं म्हणायला हरकत नाही. कारण आम्ही भेटलोच होतो ‘पिरतीचा वनवा उरी पेटला’ आणि ‘रमा राघव’ या मालिकांच्या प्रमोशनच्यावेळी. तेव्हा आमची छान मैत्री झाली. तेव्हाही आमच्या दोन्ही मालिका एकत्र लाँच झाल्या होत्या. आता योगायोगाने पुन्हा तेच होतंय. ‘अशोक मा.मा.’ आणि माझी ‘पिंगा गं पोरी पिंगा’ या दोन्ही मालिका एकत्र सुरू होत आहेत. कदाचीत आम्ही दोघी एकमेकींसाठी खूप लकी आहोत, असं ती म्हणाली.