बचत गट हे महिलांना आर्थिक सक्षमतेची हमी देतात‎:जिजाऊ सावित्री रमाई महिला बाल विकास समितीच्या वतीने भारतीताई चव्हाण यांचे व्याख्यान‎

महिलांनो तुम्हाला १० ते २० लाखांपर्यंतची कर्जे कोणत्याही तारणाशिवाय दिली जात आहेत. बचत गट महिलांना आर्थिक सक्षमतेची हमी देतात. उद्योग व व्यवसाय उभे करा. ते चालवण्यासाठी प्रशिक्षण घ्या. व्यावसायिक मानसिकता सिद्ध करा, असे आवाहन मानिनी फाउंडेशनच्या संस्थापक अध्यक्ष भारतीताई चव्हाण यांनी केले. कर्मवीर डॉ. मामासाहेब जगदाळे यांच्या जयंतीनिमित्त जिजाऊ सावित्री रमाई महिला बाल विकास समितीच्या वतीने रविवारी (दि. २) महिला मेळावा तथा महिला स्वयं रोजगार अभियान कार्यक्रमाचे आयोजन करण्यात आले. या वेळी प्रमुख पाहुण्या ॲड. भारतीताई चव्हाण महिलांना मार्गदर्शन करताना बोलत होत्या. अध्यक्षस्थानी महिला व बालविकास विभागाच्या उपायुक्त सुवर्णा पवार-खंडागळे होत्या. या वेळी ॲड. चव्हाण यांनी मानिनी फाउंडेशनची माहिती देत महिलांशी मानिनी संवाद साधला. या वेळी महिलांनी आपल्या समस्या व व्यथा मांडल्या. महिलांना स्वातंत्र्याची व सक्षमतेची प्रचिती आली. निर्भयपणे महिलांनी आपले प्रश्न उपस्थित केले. प्रास्ताविक समितीच्या अध्यक्षा प्रा. एस. एस. सुरवसे यांनी केले. प्रमुख पाहुण्यांचा परिचय मुख्याध्यापिका कविता धावणे व प्रा. ज्योती यादव यांनी करून दिला. सूत्रसंचालन सुहासिनी शिंदे यांनी केले. संस्थेचे पदाधिकारी, कार्यकारिणी सदस्य, विश्वस्त, प्राचार्य, शाखाप्रमुख, शिक्षक, शिक्षकेतर कर्मचारी, विद्यार्थी, बार्शी व धाराशिव तालुक्यातील महिला मोठ्या संख्येने उपस्थित होते. अध्यक्षीय भाषणात सुवर्णा पवार म्हणाल्या, स्वप्न झोपेत पाहू नका. पाहिलेले प्रत्येक स्वप्न साकार होत असतात. श्रम, कर्तृत्व, निष्ठा व विश्वास या जोरावर ही स्वप्ने पूर्ण होतात. महाराष्ट्राच्या शिक्षण क्षेत्रात कर्मवीरांचे योगदान उल्लेखनीय आहे. महिला सुरक्षितता हा चिंतेचा विषय आहे. मुलींबरोबर मुलांवरही संस्कार करा. महिला धोरण व कायदे आहेतच परंतु गरज आहे ती आपल्या मानसिकतेची. कायद्याची माहिती घेऊन अन्याय व अत्याचार दूर करा. स्वतःला बदला. काळाबरोबर चाला. कर्तृत्व, विश्वास आणि निष्ठेवर स्वप्न पूर्ण करा