बालसाहित्य संमेलनात मोठा विचारमंथन:पुण्यात 5 व्या अखिल भारतीय मराठी बालकुमार साहित्य संमेलनाचे यशस्वी आयोजन

पुण्यातील शुक्रवार पेठेत श्री शिवाजी मराठा सोसायटीच्या प्रांगणात ५ वे अखिल भारतीय मराठी बालकुमार साहित्य संमेलन मोठ्या उत्साहात पार पडले. अमरेंद्र भास्कर मराठी बालकुमार साहित्य संस्था, महाराष्ट्र राज्य साहित्य व संस्कृती मंडळ आणि श्री शिवाजी मराठा सोसायटी यांच्या संयुक्त विद्यमाने या संमेलनाचे आयोजन करण्यात आले होते. संमेलनाध्यक्ष स्वाती राजे यांनी बालसाहित्याला साहित्य विश्वातील सर्वात सुंदर दालन असे संबोधले. त्यांनी साहित्य संमेलनांचे महत्त्व विशद करताना सांगितले की, ही संमेलने वादासाठी नसून विविध विचारप्रवाहांच्या साहित्यिकांमध्ये संवाद साधण्यासाठी आणि समाजाला वैचारिक, सांस्कृतिक दिशा देण्यासाठी असतात. कार्यक्रमाच्या सुरुवातीला ध्वजारोहण आणि ग्रंथदिंडीचे आयोजन करण्यात आले होते, ज्यामध्ये विविध शाळांमधील विद्यार्थ्यांनी उत्साहाने सहभाग घेतला. ज्येष्ठ साहित्यिक न.म. जोशी यांनी मुलांशी संवाद साधताना देशाची प्रगती त्यांच्याच हातात असल्याचे सांगितले. अमरेंद्र भास्कर मराठी बालकुमार साहित्य संमेलनाचे अध्यक्ष राजन लाखे यांनी मुलांसोबत मातृभाषेत संवाद साधण्याच्या महत्त्वावर भर दिला. प्रसिद्ध लेखक मिलिंद जोशी यांनी आजच्या डिजिटल युगात पुस्तकांचे महत्त्व पटवून देताना सांगितले की, तंत्रज्ञान वापरासाठी असते, तर माणसे प्रेम करण्यासाठी असतात. त्यांनी मुलांना जीवन समजावून सांगणारी पुस्तके वाचण्याचे आवाहन केले. कार्यक्रमाला श्री शिवाजी मराठा सोसायटीचे मानद सचिव अण्णा थोरात, महाराष्ट्र राज्य साहित्य व संस्कृती मंडळाचे सदस्य प्रकाश होळकर, बाल अभिनेता शार्दूल धारणे, संस्थेचे सहसचिव विकास गोगावले आणि बालकुमार साहित्य संस्थेचे कार्यकारिणी सदस्य उपस्थित होते.