बुलढाणा: मालवाहू वाहनाच्या धडकेत ४ पोलीस कर्मचारी जखमी

बुलढाणा, पुढारी वृत्तसेवा: वाहतूक शाखेच्या पोलिसांच्या गाडीला एका भरधाव मालवाहू वाहनाने धडक दिल्याने चार पोलिस कर्मचारी गंभीर जखमी झाले आहेत. या अपघातात दोन्ही वाहनांचे मोठे नुकसान झाले आहे. बुलढाणा-खामगाव मार्गावर नांद्री फाट्याजवळ शनिवारी (दि.१६) सकाळी ६.३०च्या सुमारास हा अपघात झाला.

याबाबत अधिक माहिती अशी की, आज सकाळी भरधाव जात असलेल्या मालवाहू वाहनाने (एमएच २१-बीएच ७६४८) पोलिसांच्या गाडीला (एम एच २८ -बीके ४८९७) धडक दिली. या दुर्घटनेत पोलीस कर्मचारी सागर शेळके, हनुमान महाले, सुनिल दांडगे व चालक खुमकर हे चार जण जखमी झाले. त्यांच्यावर सुरूवातीला खामगावच्या जिल्हा सामान्य रूग्णालयात व नंतर अकोला येथील शासकीय वैद्यकीय महाविद्यालय रुग्णालयात उपचार सुरू आहेत.