मच्छिंद्रनाथ यात्रेनिमित्त मायंबात वीस हजार भाविकांना महाप्रसाद:अहिल्यानगरच्या चैतन्य नवनाथ भक्त सेवा मंडळाचा उपक्रम, मंदिराला सजावट

मायंबा येथील मच्छिंद्रनाथ यात्रेनिमित्त अहिल्यानगरच्या चैतन्य नवनाथ भक्त सेवा मंडळाच्या वतीने २० हजार नाथ भक्तांना महाप्रसादाचे वाटप करण्यात आले, त्यासाठी भव्य मंडप उभारण्यात आला होता. मागील ३१ वर्षांपासून मंडळातर्फे श्रीक्षेत्र मायंबा येथे भंडारा (महाप्रसाद) कार्यक्रम होत आहे. नगरचे आदित्यनाथजी महाराज यांनी समाधीची विविध प्रकारची फळे आणि रंगीबेरंगी फुलांनी सजावट करण्यात आली होती. नाथ भक्तांच्या अभुतपूर्व गर्दीत हा भंडारा संपन्न झाला. उद्योजक नरेंद्र फिरोदिया यांनी या उपक्रमाचे कौतुक केले. महाप्रसादाचा पंगतीत लाभ घेतला. तसेच आगडगावचे काळभैरवनाथ मंदिराचे विश्वस्त मंडळासह अनेक जण उपस्थित होते. त्यांनीही प्रसादाचा लाभ घेतला. नाथभक्तांना महाप्रसाद देण्यासाठी नाथसेवक व मुलांची टीम होती. भंडारा संपन्न होण्यासाठी मच्छिंद्रनाथ देवस्थान ट्रस्टचे सहकार्य लाभले. भंडाऱ्यासाठी सहकार्य करणाऱ्या नाथ भक्तांचे मंडळातर्फे आभार मानण्यात आले. मायंबा येथे पहाटे नाथांच्या महाआरतीनंतर यात्रेस प्रारंभ झाला. नगर, नाशिक, पुणे, औरंगाबाद, लोणावळा, बीड, आष्टी, गंगापूर, ठाणे येथील भाविकांनी गर्दी केली होती. देवस्थान समितीतर्फे निवास व्यवस्था, पार्किंग, आरोग्य सुविधा पिण्याचे पाणी पुरवण्यात आले. यात्रेनिमित्त मच्छिंद्रनाथांच्या समाधी मंदिरावर आकर्षक विद्युत रोषणाई केल्याने रात्री मंदिर खुलून दिसत होते. नगरच्या चैतन्य नवनाथ भक्तसेवा मंडळाच्या वतीने मंदिर व मंदिर परिसरात आकर्षक फुले व फुग्यांनी केलेली सजावट येणाऱ्या भाविकांचे लक्ष वेधून घेत होती. ७०० किलो भरडा, ७०० किलो गूळ, ११ डबे तूप १०० किलोपासून चालू झालेला भंडारा आज ७०० किलो भरडा, ७०० किलो गुळ, ७०० किलो तांदुळ, ११ डबे गायीचे गावरान तूप व सांबरसाठी लागणाऱ्या डाळी, तेल, मसाले, इतर साहित्य, भाजीपाला असे २५०० किलोपर्यंत पोहोचला आहे. भंडाऱ्याकरीता २०० बाय २०० फुट मंडप उभारण्यात आला होता. त्यात पंगत व बुफे पद्धतीने जेवण देण्यात आले. बडेबाबा यांना मंडळाच्या वतीने ५६ भोग, मेदू वडा, आंबिल घुगऱ्या आणि सांबर, भात, लापशीच्या नैवेद्य दाखवण्यात आला.