मणिपूरमध्ये हिंसाचार थांबेना, काँग्रेसने गृहमंत्री अमित शहांचा राजीनामा मागितला

नवी दिल्ली, पुढारी वृत्तसेवा: मणिपूरमध्ये सुरू असलेल्या हिंसाचारासाठी काँग्रेसने केंद्र सरकारला जबाबदार धरले आहे. हा हिंसाचार रोखण्यात अपयशी ठरल्याबद्दल काँग्रेसने केंद्रीय गृहमंत्री अमित शहा यांच्या राजीनाम्याची मागणी केली आहे. मणिपूरमध्ये शांतता प्रस्थापित करण्याच्या प्रयत्नांना चालना देण्यासाठी काँग्रेसने पंतप्रधान नरेंद्र मोदी यांच्याकडे सर्वपक्षीय बैठक बोलावण्याची मागणी केली आहे.

जयराम रमेश म्हणाले की, पंतप्रधान मोदींनी वेळ काढून मणिपूरला भेट द्यावी. मणिपूर गेल्या १८ महिन्यांपासून जळत आहे. तरीही पंतप्रधानांनी राज्याला भेट दिली नाही हे विचित्र असल्याचे ते म्हणाले. मणिपूरच्या मुख्यमंत्र्यांचे संरक्षण करणे हेच अमित शाह यांचे एकमेव कर्तृत्व आहे, असा आरोप रमेश यांनी केला. तर मणिपूरच्या जनतेचे रक्षण करण्यात ते अपयशी ठरले आहेत. पंतप्रधान मोदींनी मणिपूरमधील सर्व पक्षांच्या शिष्टमंडळांची भेट घेऊन तेथे काय चालले आहे ते समजून घ्यावे, असे काँग्रेस खासदार म्हणाले. मणिपूरमध्ये ३१ जुलै २०२४ पासून पूर्णवेळ राज्यपाल नाही. पूर्णवेळ राज्यपालाची तातडीने नियुक्ती करावी, असे ते म्हणाले.

यावेळी मणिपूर काँग्रेसचे अध्यक्ष मेघचंद्र सिंह म्हणाले की, मणिपूरमध्ये कायदा आणि सुव्यवस्था नाही, 'डबल इंजिन सरकार'मुळे संपूर्ण अराजकता पसरली आहे. दरम्यान, पक्षाचे मणिपूर प्रभारी गिरीश चोडणकर म्हणाले की, हिंसाचारामुळे इतर त्रासही झाला आहे. हे केवळ दुहेरी इंजिन सरकारचे संपूर्ण अपयशच दर्शवत नाही, तर देशाच्या इतिहासातील हे एक मानवतावादी संकट बनले आहे. त्यांनी दावा केला की, गेल्या १८ महिन्यांत सुमारे ३०० लोकांना आपला जीव गमवावा लागला आहे, सुमारे ६० हजार लोक विस्थापित झाले आहेत आणि सुमारे ५० हजार लोक अजूनही अत्यंत असुरक्षित परिस्थितीत मदत शिबिरांमध्ये राहत आहेत.