मोशीत अत्याधुनिक सुपर स्पेशालिटी रुग्णालयाचे उद्घाटन:मुख्यमंत्री फडणवीस यांच्या हस्ते धनश्री रुग्णालयाचे लोकार्पण; महात्मा फुले जन आरोग्य योजनेंतर्गत 1300 सेवा मोफत

पुणे जिल्ह्यातील मोशी येथे धनश्री सुपर स्पेशालिटी रुग्णालयाचे उद्घाटन मुख्यमंत्री देवेंद्र फडणवीस यांच्या हस्ते करण्यात आले. या वेळी उपमुख्यमंत्री अजित पवार, जलसंपदा मंत्री राधाकृष्ण विखे पाटील यांच्यासह अनेक मान्यवर उपस्थित होते. मुख्यमंत्री फडणवीस यांनी सांगितले की, वाढत्या महागाईच्या काळात आरोग्य सेवा अधिक खर्चिक झाल्या आहेत. त्यामुळे महाराष्ट्र शासनाने 'युनिव्हर्सल हेल्थकेअर' प्रणाली सुरू केली असून, महात्मा फुले जन आरोग्य योजनेअंतर्गत मोठ्या रुग्णालयांमध्ये १,३०० सेवा मोफत दिल्या जात आहेत. केंद्र शासनाच्या १,८०० सेवांचे पॅकेज राज्यातील नागरिकांना उपलब्ध करून देण्याचा शासनाचा प्रयत्न आहे. धनश्री रुग्णालयामध्ये अत्याधुनिक वैद्यकीय सुविधा उपलब्ध करून देण्यात आल्या आहेत. रोबोटिक सर्जरीसारख्या आधुनिक तंत्रज्ञानाचा वापर करून रुग्णांना दर्जेदार उपचार दिले जाणार आहेत. मुख्यमंत्री सहायता कक्ष आणि धर्मादाय सहायता कक्षाच्या माध्यमातून विशेष पॅकेजमध्ये न बसणाऱ्या आजारांसाठी अर्थसहाय्य देण्यात येणार आहे. उपमुख्यमंत्री अजित पवार यांनी सांगितले की, ग्रामीण आणि निमशहरी भागातही उच्च दर्जाच्या वैद्यकीय सुविधांची गरज लक्षात घेऊन धनश्री हॉस्पिटलने १०० खाटांचे आधुनिक रुग्णालय सुरू केले आहे. राज्य शासन ग्रामीण भागातही दर्जेदार आरोग्य सेवा पोहोचवण्यासाठी विविध योजना राबवत असून, वैद्यकीय क्षेत्रात महाराष्ट्राने आघाडी घेतली आहे.