मोहोळमध्ये राजकीय रंग चढले:विधानसभेला राष्ट्रवादीपासून दुरावलेले उमेश पाटील पुन्हा "देवगिरी'च्या" सावली'त

नरखेड (ता. मोहोळ) येथील राष्ट्रवादी काँग्रेसचे माजी राज्य मुख्य प्रवक्ते उमेश पाटील यांनी राष्ट्रवादी (उपमुख्यमंत्री अजित पवार गट) मध्ये पुनरागमन केले आहे. मंगळवारी रात्री मुंबई येथील देवगिरी बंगल्यावर राज्य सरकारमधील विविध खात्यांचे मंत्री व राष्ट्रवादी काँग्रेसच्या आमदारांच्या उपस्थितीत त्यांचा पक्षप्रवेश झाला. महाराष्ट्राचे उपमुख्यमंत्री व राष्ट्रवादी काँग्रेसचे नेते अजित पवार यांनी स्वतः घड्याळाच्या चिन्हाचा शेला घालून त्यांचे पक्ष प्रवेश घेत स्वागत केले. मोहोळ तालुक्यातील राजकारणात नेतृत्व कसोटीवर उजव्या ठरलेल्या उमेश पाटील यांच्या पक्ष प्रवेशाने राजकीय समीकरणांची जुळवाजुळव चर्चेचा केंद्रबिंदू ठरली आहे. उमेश पाटील यांच्या पक्षप्रवेशामुळे मोहोळ तालुक्यातील राजकीय समीकरणे नव्या वळणावर गेली आहेत. विधानसभा निवडणुकीच्या पूर्वी त्यांचा माजी आमदार राजन पाटील यांच्याशी टोकाचे मतभेद झाला होता. तालुक्यातील नागरिकांना गैरसोईचे असलेले अनगर अप्पर तहसील कार्यालयाच्या मुद्द्यावर त्यांनी आमदार राजू खरे यांना निवडून आणण्यासाठी सिंहाचा वाटा उचलला. विधानसभा निवडणुकीनंतर, उपमुख्यमंत्री अजित पवार यांनी मोहोळ येथे बाजार समितीच्या सभेदरम्यान उमेश पाटील यांच्यावर टीका केली होती. त्यानंतर त्यांनी राष्ट्रवादी काँग्रेसच्या राज्य प्रवक्ते पदाचा राजीनामा देत पक्ष त्याग केला होता. त्यानंतर मात्र अनेक पक्षाच्या ऑफर असतानाही त्यांनी कोणत्याही पक्षात प्रवेश केला नव्हता. दरम्यान त्यांनी मोहोळ तालुक्यातील ३० वर्षे प्रस्थापित पार्टीचा आमदार पराभूत करून नव्याने त्यांच्या विचारांचा आमदार निवडून आणला आहे. दिव्य मराठी मोहोळच्या राजकीय समीकरणांकडे जिल्ह्याचे लक्ष सध्या राष्ट्रवादी काँग्रेस (अजित पवार गट) मध्ये माजी आमदार राजन पाटील कार्यरत असताना उमेश पाटील यांचा पक्षप्रवेश हा मोठा राजकीय संदेश मानला जात आहे. त्यामुळे आगामी मोहोळ नगरपरिषद, जिल्हा परिषद व पंचायत समिती निवडणुकांत कोणती नवी समीकरणे तयार होतात? याकडे तालुक्याचे व जिल्ह्याचे लक्ष लागले आहे. महायुती बळकट करण्यावर भर देणार ^सामान्य कार्यकर्ता इर्षेने आणि जिद्दीने जर कामाला लागला तर अपराजित मातब्बर नेत्यांनाही पराभूत करू शकतो. आमदार राजू खरे यांना ३०,००० पेक्षा जास्त मताधिक्याने विजयी करून इतिहास रचला. मोहोळ विधानसभा मतदारसंघ व सोलापूर जिल्ह्यात राष्ट्रवादी काँग्रेस (अजित पवार गट), भाजप व शिवसेना (एकनाथ शिंदे गट) ही युती आगामी काळात अधिक बळकट करण्यावर भर देणार आहे. -उमेश पाटील, नेते राष्ट्रवादी