युवक काँग्रेसचा केंद्र सरकारवर हल्लाबोल:अमेरिकेतील भारतीयांच्या निर्वासनासह बजेटमधील तरुणांच्या प्रश्नांवर पुण्यात आक्रमक निदर्शने

पुण्यातील गुडलक चौक, डेक्कन येथे युवक काँग्रेसने केंद्र सरकारविरोधात जोरदार आंदोलन केले. प्रदेश युवक काँग्रेसचे कार्याध्यक्ष शिवराज मोरे यांच्या नेतृत्वाखाली झालेल्या या आंदोलनात दोन प्रमुख मुद्दे उपस्थित करण्यात आले. पहिला मुद्दा होता केंद्रीय अर्थसंकल्प २०२५ मध्ये तरुणांसाठी कोणतेही ठोस धोरण नसल्याबाबत, तर दुसरा मुद्दा होता अमेरिकेतून भारतीय नागरिकांच्या निर्वासनाबाबत. आंदोलनात शिवराज मोरे यांनी बजेटमध्ये तरुणांसाठी रोजगार निर्मितीबाबत कोणतीही स्पष्टता नसल्याचा आरोप केला. महाराष्ट्र युवक काँग्रेसच्या मीडिया विभागाचे अध्यक्ष अक्षय जैन यांनी सरकारवर कॉर्पोरेट हितांना प्राधान्य देत सामान्य तरुणांकडे दुर्लक्ष केल्याचा आरोप केला. पुणे शहर अध्यक्ष सौरभ अमराळे यांनी शहरातील बेरोजगारीचा मुद्दा उपस्थित केला. त्यांनी सरकारी आणि खासगी क्षेत्रात नोकरीच्या संधींचा अभाव असल्याचे सांगितले. युवक काँग्रेसने सरकारला इशारा दिला की रोजगार निर्मितीसाठी ठोस कृती आराखडा जाहीर न केल्यास महाराष्ट्रभर तीव्र आंदोलन छेडले जाईल. अमेरिकेतील भारतीयांच्या निर्वासनाच्या मुद्द्यावर युवक काँग्रेसने कडक भूमिका घेतली. कोलंबियाने स्वतःचे विमान पाठवून नागरिकांना सुरक्षित परत आणले, मात्र भारत सरकारने असे का केले नाही, असा सवाल उपस्थित करण्यात आला. या प्रकरणी केंद्र सरकारने अमेरिकेकडे कडक निषेध नोंदवावा आणि भारतीय नागरिकांच्या सुरक्षेसाठी ठोस पावले उचलावीत, अशी मागणी करण्यात आली.