रस्त्याच्या कामासाठी बिडकीनचे ग्रामस्थ आक्रमक:छत्रपती संभाजीनगर-पैठण मार्गावर रास्ता रोको, प्रतिकात्मक तिरडी काढत प्रशासनाचा केला निषेध

बिडकीनजवळील नीलाजगाव फाटा ते शेकटा फाटा रस्त्याच्या कामासाठी परिसरातील ग्रामस्थ आक्रमक झाले आहेत. रस्ता कामासाठी बिडकीन येथे आज ग्रामस्थांच्या वतीने आंदोलन करण्यात आले. यावेळी प्रशासनाची प्रतिकात्मक तिरडी काढून निषेध करण्यात आला. बिडकीनजवळील एका बाजूचा रस्त्याचे डांबरीकरण त्वरित करावे, अशी मागणी ग्रामस्थांकडून करण्यात आली. आंदोलनावेळी प्रशासकीय अधिकाऱ्यांना ग्रामस्थांच्या रोषाचा सामना करावा लागला. छत्रपती संभाजीनगर ते पैठण या राष्ट्रीय महामार्गाचे काम सध्या सुरू आहे. मात्र बिडकीन येथे नीलाजगाव फाटा ते शेकटा फाटा यादरम्यान रस्त्याची कुठलेही काम झाले नसल्याने या रस्त्याने जाताना नागरिकांना कसरत करावी लागते. तसेच पाईपलाईनच्या कामामुळे रस्ता उखडला गेल्याने धुळीचे साम्राज्य पसरले आहे. त्यामुळे नागरिकांचे आरोग्य धोक्यात आले असून या ठिकाणी त्वरित एक साईटचा रस्ता डांबरीकरण करण्यात यावा तसेच निलजगाव रोडवर स्पीड ब्रेकर टाकावे, अशी मागणी ग्रामस्थांकडून करण्यात येत आहे. रस्त्याचे काम चालू असताना या ठिकाणी अनेकांना प्राण गमवावे लागले. याबाबत राष्ट्रीय महामार्गाच्या अधिकाऱ्यांच्या कानावर रस्ता दुरुस्तीसाठी वेळोवेळी मागणी करण्यात आली. परंतु, त्याकडे दुर्लक्ष झाल्याने ग्रामस्थांकडून बुधवारी रास्ता रोको आंदोलन करण्यात आले. सकाळी दहा वाजेपासून ग्रामस्थ रस्त्यावर बसले होते. दुपारपर्यंत या आंदोलनावर तोडगा निघाला नाही. राष्ट्रीय महामार्गाचे कार्यकारी अधिकारी संघर्ष मेश्राम, अनिकेत कुलकर्णी, शेख वसीम हे आंदोलकांशी चर्चा केली. मात्र एकतर्फी डांबरीकरण करून द्या, या मागणीवर आंदोलन ठाम होते. याप्रसंगी आंदोलकाशी बोलताना कार्यकारी अधिकारी मेश्राम यांनी आमच्या हातात हे नाही असे सांगितले असता मनोज पेरे यांनी तुमच्या हातात काही नाही, मग तुम्ही कशाला आलात? असा सवाल करत धारेवर धरले. तसेच रस्त्याच्या एका बाजूचे काम सुरू झाल्याशिवाय किंवा काम सुरू करण्याबाबत लेखी आश्वासन दिल्याशिवाय आंदोलन थांबणार नसल्याचा इशारा दिला. याप्रसंगी बिडकीनचे सरपंच अशोक धर्मे, मनोज पेरे, राजेंद्र चव्हाण यांनी बिडकीनची बाजू मांडली. सुमारे तीन तासांपासून हे आंदोलन सुरू असून रस्त्याच्या दुतर्फा वाहनाच्या रांगाच रांगा लागलेल्या आहेत. या आंदोलनात बिडकीनचे ग्रामस्थ व परिसरातील ग्रामस्थ यांसह सर्वपक्षीय कार्यकर्ते सहभागी झाले.