ठाणे : घाटाच्या नावाखाली उल्हासनदी गिळंकृत करण्याचा घाट

डोंबिवली : उल्हास नदीच्या प्रवाहावर असंख्य लोकांचे जीवन अवलंबून आहे. तथापी नदीच्या किनारपट्टीवर घाटाच्या नावाखाली बेकायदेशीर बांधकाम सुरू करण्यात येत आहे. ज्यामुळे नदीच्या नैसर्गिक प्रवाहात अडथळा निर्माण होणार आहे. या बांधकामाचे मुख्य कारण नदीच्या घाटाचे संरक्षण असल्याचे सांगितले जात आहे. मात्र नदीरक्षण, नदी संवर्धन मानकांसह सरकारी नियमांचे उल्लंघन करून केले जात असल्याने हे बांधकाम तात्काळ थांबविण्याची मागणी करण्यात आली आहे.

सदर बांधकाम नदी किनारपट्टीत घाटाच्या नावाखाली केले जात आहे, जे नदीच्या प्रवाहाशी संबंधित आहे. ज्या ठिकाणी नदीचा नैसर्गिक प्रवाह बाधित होतो. त्यामुळे सदर ठिकाणी कोणत्याही प्रकारच्या बांधकामासाठी संबंधित विभागांची परवानगी घेणे आवश्यक ठरते. हे बांधकाम घाटाच्या नावाखाली उभारण्यात आले आहे. असे बांधकाम नदी रक्षण व संवर्धन मानकांचे उल्लंघन करत आहे. या बांधकामासाठी सरकारी पैशांचा वापर करण्यात येत आहे. घाटाच्या नावाखाली तेथील एका गृहसंकुलास पुरापासून संरक्षण मिळवणे हे उद्दिष्ट असल्याचा गौप्यस्फोट उल्हास नदी बचाव कृती समितीने केला आहे.

बेकायदेशीर बांधकामाविरोधात संघर्ष करण्यासाठी सर्व नागरिक, पर्यावरणप्रेमी आणि सामाजिक कार्यकर्त्यांनी एकत्र यावे. उल्हास नदीच्या संक्षणासाठी किनारपट्टीत सुरू करण्यात आलेल्या बेकायदा बांधकामाला विरोध करण्यासाठी एकत्र येण्याचे उल्हासनदी बचाव कृती समितीकडून आवाहन केले आहे. प्रशासनाने हे काम तातडीने थांबविण्याची समितीने मागणी केली आहे. अन्यथा जनआंदोलन करण्यात येईल, असाही इशारा समितीने निवेदनाद्वारे दिला आहे.