बालनाट्य स्पर्धेत अमरावतीच्या अद्वैत संस्थेचा दबदबा:'तेरा मेरा सपना टिव्ही हो अपना' नाटकाला सर्वोत्कृष्ट नाटक सह 6 पुरस्कार

अमरावतीच्या साई हेरिटेज सोसायटीतील बालकलावंतांनी एकविसाव्या महाराष्ट्र राज्य बालनाट्य स्पर्धेत मोठे यश संपादन केले आहे. विशाल तराळ यांच्या नेतृत्वाखालील अद्वैत बहुस्वयंसेवी संस्थेने निर्मिती केलेल्या 'तेरा मेरा सपना टिव्ही हो अपना' या नाटकाने सर्वोत्कृष्ट नाटकाचा पुरस्कार पटकावला आहे. सांस्कृतिक कार्य संचालक विभीषण चवरे यांनी जाहीर केलेल्या निकालात या नाटकाला एकूण सहा पुरस्कार मिळाले. दिग्दर्शक विशाल तराळ यांना सर्वोत्कृष्ट दिग्दर्शनाचा पुरस्कार, तृप्ती मेश्राम यांना नेपथ्याचे प्रथम पारितोषिक आणि स्वाती तराळ यांना रंगभूषेचे प्रथम पारितोषिक मिळाले. या नाटकासह पहिल्या चार क्रमांकावर आलेल्या नाटकांची अंतिम फेरीसाठी निवड करण्यात आली आहे. २१ ते ३१ जानेवारी दरम्यान सिपना अभियांत्रिकी महाविद्यालय आणि अकोला येथील प्रमिलाताई ओक सभागृहात झालेल्या या स्पर्धेत एकूण ४४ नाट्यप्रयोग सादर करण्यात आले. केशव भागवत, दिलीप देवराणकर आणि श्रीमती वैशाली पाटील यांनी परीक्षक म्हणून काम पाहिले. इतर विजेत्या नाटकांमध्ये संत गजानन महाराज बहुउद्देशीय शिक्षण प्रसारक मंडळ, अकोलाच्या 'जगाओ मेरा देश' या नाटकाला द्वितीय, श्री साई व्यंकटेश्वर बहुउद्देशीय संस्था, यवतमाळच्या 'परीकथेची आत्महत्या' या नाटकाला तृतीय आणि आर.डी.जी. पब्लिक स्कूल, अकोलाच्या 'मला पण बालपण हवंय' या नाटकाला चतुर्थ क्रमांक मिळाला. अखिल भारतीय नाट्य परिषद नियामक मंडळाचे सदस्य ॲड. प्रशांत देशपांडे, जिल्हाध्यक्ष ॲड. चंद्रशेखर डोरले यांनी सर्व विजेत्यांचे अभिनंदन केले.