आंतरराज्यीय चोरट्याची शटर डाउन:मिरज तालुक्यातील लिंगनूरमधून 40 पेक्षा जास्त घरफोड्या करणाऱ्या सराईत गुन्हेगाराला अटक

फ्रेजरपुरा पोलिसांनी आंतरराज्यीय सराईत घरफोडी करणारा गुन्हेगार लोकेश रावसाहेब सुतार याला अटक केली आहे. चाळीसहून अधिक घरफोड्या करणाऱ्या या आरोपीला त्याच्या मूळ गावी मिरज तालुक्यातील लिंगनूर येथून ताब्यात घेण्यात आले. ३१ ऑगस्टला रात्री १०.२० वाजता उमेश एकनाथ आगलावे यांच्या घरी झालेल्या चोरीच्या घटनेनंतर पोलिसांनी या गुन्ह्याचा तपास सुरू केला. आरोपीने घराचे कुलूप तोडून आत प्रवेश केला आणि लाकडी कपाटातून २ लाख रुपये लंपास केले होते. पोलिसांनी सीसीटीव्ही फुटेज, वाहनांची माहिती, हॉटेल्स आणि लॉजेसमधील नोंदी तपासून आरोपीचा मागोवा घेतला. सांगली आणि कोल्हापूर परिसरात शोध मोहीम राबवल्यानंतर गुप्त बातमीदारांच्या माहितीच्या आधारे त्याला अटक करण्यात यश मिळाले. पोलिसांनी त्याच्याकडून ६० हजार रुपये जप्त केले आहेत. याशिवाय त्याचा साथीदार सुखदेव उर्फ बंडू हनुमंत नाईक यालाही अटक करण्यात आली. पोलीस आयुक्त कैलास पुंडकर यांच्या मार्गदर्शनाखाली फ्रेजरपुरा पोलीस ठाण्याच्या पथकाने ही कारवाई यशस्वी केली. या पथकात वरिष्ठ पोलीस निरीक्षक निलेश करे, सहायक पोलीस निरीक्षक निलेश गावंडे यांच्यासह डीबी पथकाचे सदस्य आणि इतर पोलीस कर्मचाऱ्यांचा समावेश होता.