हिंगोली, वाशीम अकोला रेल्वेस्थानकांची पाहणी:दक्षिण मध्य रेल्वेच्या महाव्यवस्थापकांनी प्रवाशांना दिल्या जाणाऱ्या सुविधांचा घेतला आढावा

दक्षिण मध्य रेल्वेचे महाव्यवस्थापक अरुणकुमार जैन यांनी बुधवारी ता. ५ हिेंगोलीसह वाशीम, अकोला रेल्वेस्थानकांची पाहणी करून प्रवाशांना आवश्‍यक सुविधा उपलब्ध करून देण्याच्या सुचना दिल्या. यावेळी त्यांनी प्रवाशांसोबत संवादही साधला. तर हिंगोलीत प्रवाशी संघटनेने विविध मागण्यांचे निवेदन सादर केले. दक्षिण मध्यरेल्वेचे महाव्यवस्थापक जैन यांच्यासह विभागीय रेल्वे व्यवस्थापक निती सरकार यांच्यासह रेल्वेचे वरिष्ठ अधिकारी उपस्थित होते. यावेळी त्यांनी हिंगोली ते वाशीम रेल्वे मार्गावरील स्टील गर्डर पुलाची पाहणी केली. तसेच हिंगोली रेल्वे स्थानकाला भेट देऊन परिसराची पाहणी केली. यावेळी प्रवाशांना दिल्या जाणाऱ्या सुविधांचा आढावा घेतला. यावेळी त्यांनी लोकप्रतिनिधी, प्रवाशांसोबत संवाद साधला. यावेळी प्रवाशांनी नवीन रेल्वेगाड्या सुरु कराव्यात, काही स्थानकांवर थांब्याची तरतुद करावी अशी मागणी केली. त्यानंतर त्यांनी अकोला रेल्वे स्थानकाची तपासणी सुरू केली त्यामध्ये त्यांनी स्टेशन मास्तरांची खोली, फूट ओव्हर ब्रिज, रनिंग रूमची तपासणी केली. अकोला ते वाशिम दरम्यानच्या लेव्हल क्रॉसिंग गेटची पाहणी केली आणि सुरक्षा क्रमांक एक्सचेंज रजिस्टर आणि आपत्कालीन उपकरणे आदींची तपासणी केली. त्यानंतर वाशिम रेल्वे स्थानकावर पोहोचले, यावेळी त्यांनी स्टेशन मास्टरचे कार्यालय आणि प्लॅटफॉर्मवर उपलब्ध प्रवासी सुविधा, स्थानक परिसर, क्रू लॉबी आणि परिभ्रमण क्षेत्राची पाहणी केली. यावेळी स्थानकावर उपलब्ध खाद्यपदार्थांच्या स्टॉलचीही त्यांनी पाहणी करून खाद्यपदार्थांचे दर आणि दर्जा यांचा आढावा घेतला. वरिष्ठ अधिकारी येणार असल्यामुळे रेल्वेस्थानक चकाचक झाल्याचे चित्र होते.