लासूरगाव पीएमश्री जि. प. प्रशालेची सहल विमानाने हैदराबादला रवाना:तीन दिवस 32 विद्यार्थी बघणार रामोजी फिल्म सिटीसह विविध पर्यटनस्थळे

वैजापूर तालुक्यातील लासूरगाव येथील पीएमश्री जिल्हा परिषद प्रशालेतील ३२ विद्यार्थ्यांची शैक्षणिक सहल गुरुवारी छत्रपती संभाजीनगर विमानतळावरून सायंकाळी ८:१० वाजता विमानाद्वारे निघून ९:५० वाजता हैद्राबाद एअरपोर्टवर पोहोचली आहे. विमानाद्वारे हैदराबादला प्रथमच जात असल्याने विद्यार्थी भारावून गेले होते. वेगवेगळ्या उपक्रमांमध्ये अग्रेसर असलेली पीएमश्री हायस्कूल लासूरगावची शाळा आणखी एका नव्या उपक्रमाद्वारे परिसरामध्ये चर्चेत आली आहे. सहलीसाठी व विद्यार्थ्यांना प्रोत्साहित करण्यासाठी जि.प.चे मुख्य कार्यकारी अधिकारी विकास मीणा, शिक्षणाधिकारी जयश्री चव्हाण, छत्रपती संभाजीनगर जिल्ह्याचे पालकमंत्री संजय शिरसाट यांनी विद्यार्थ्यांना शुभेच्छा दिल्या. त्याचप्रमाणे वैजापूर पंचायत समितीचे गटशिक्षणाधिकारी हेमंत उशीर, शिविअ बाळासाहेब म्हस्के, मनीष दिवेकर, लासूरगाव केंद्राचे केंद्रप्रमुख भगवान कोळसे, केंद्रीय मुख्याध्यापक संतोष जाधव यांनी विद्यार्थ्यांचे अभिनंदन केले. तसेच वैजापूर तालुक्याचे आमदार प्रा. रमेश बोरनारे यांनी सहलीसाठी निघालेल्या विद्यार्थ्यांना एएस क्लब जवळील तिसगाव चौफुलीवर प्रत्यक्ष हितगूज साधून शुभेच्छा दिल्या. सरपंच नंदाताई वसंतराव हुमे, उपसरपंच रितेश मुनोत, व्यवस्थापन समितीचे अध्यक्ष बाळू पाटील नेटके, उपाध्यक्ष रवींद्र देशमुख आदी देवी दाक्षायणी मंदिरात सहलीच्या विद्यार्थ्यांना शुभेच्छा देण्यासाठी उपस्थित होते. एका विद्यार्थ्याचा ६ हजार रुपये तिकिटाचा दर सहलीमध्ये १९ विद्यार्थिनी तर १३ विद्यार्थी आणि पाच शिक्षकांचा समावेश आहे. एका विद्यार्थ्याची शैक्षणिक सहलची फीस १२ हजार रुपये असून विमानाने हैदराबादला जाण्यासाठी एका विद्यार्थ्याला जवळपास सहा हजार रुपये तिकीट होते. तीन दिवस हैदराबाद येथील रामोजी फिल्म सिटीसह विविध पर्यटन स्थळे दाखवून परत रेल्वेने सहल वापस येणार आहे, अशी माहिती मुख्याध्यापक राऊत यांनी दिली. विद्यार्थ्यांच्या चेहऱ्यावर आनंद दिसून येत होता.