शिकण्यात एकलव्यासारखी एकाग्रता हवी, सरावानंतरच एक्स्पर्ट होता येते:पद्मश्री डॉ. संजय धांडे यांचे स्वेरीच्या दुसऱ्या पदवीदान समारंभात प्रतिपादन‎

आपण एकलव्यासारखे विद्यार्थी व्हा. खूप सराव केल्यावर आपल्या कार्यात एक्स्पर्ट होता येते. सकारात्मकता, गुणवत्ता, अचूकता, एकाग्रता ही कोणत्याही विद्यापीठात शिकवली जात नाही, तर या बाबी स्वतः आत्मसात कराव्या लागतात. कठोर परिश्रम केल्यानंतर मिळालेल्या यशाचा आनंद हा दीर्घकाळ टिकतो. एकलव्याने मातीच्या पुतळ्याला प्रत्यक्ष गुरु मानून धनुर्विद्येचे शिक्षण घेतले. आपणदेखील आपल्या शिकण्यात एकलव्यासारखी एकाग्रता साधावी.’ असे प्रतिपादन आयआयटी, कानपूरचे माजी संचालक, शिक्षणतज्ञ, पद्मश्री प्रा. डॉ. संजय धांडे यांनी केले. गोपाळपूर (ता. पंढरपूर) येथील स्वेरीमध्ये संस्थास्तरीय दुसरा दीक्षांत समारंभ संपन्न झाला. याप्रसंगी प्रमुख पाहुणे कानपूर आयआयटीचे माजी संचालक पद्मश्री डॉ. संजय धांडे हे होते. विशेष अतिथी प्राध्यापक डॉ. भास्कर थोरात हे होते. प्रास्ताविक करताना स्वेरीचे संस्थापक सचिव, प्राचार्य डॉ. बी. पी. रोंगे म्हणाले, 'स्वेरीत सध्या संशोधनाचे वातावरण तयार झाले असून, याद्वारे प्राध्यापक व विद्यार्थ्यांचे व्यक्तिमत्त्व विकसित होत आहे. सकारात्मक विचारसरणीमुळे संस्थेत प्रगती होताना दिसत आहे'. असे सांगून विद्यार्थी दशेतच आपले ध्येय ठरवा व त्या दिशेने झेप घ्या, असे आवाहन त्यांनी केले. यावेळी मेधा धांडे, संस्थेचे अध्यक्ष दादासाहेब रोंगे, एन. एस. कागदे, संस्थेचे माजी अध्यक्ष व विश्वस्त धनंजय सालविठ्ठल, विश्वस्त एच. एम. बागल, विश्वस्त बी. डी. रोंगे, विश्वस्त प्रा. सूरज रोंगे यांच्यासह सर्व प्राचार्य, अधिष्ठाता, विभागप्रमुख, प्राध्यापक, विद्यार्थी व पालक आदी उपस्थित होते. डॉ. थोरात म्हणाले, ‘उद्योजक होण्यासाठी मोठे असावेच असे नाही, लहान असले तरी चालते. फक्त परिश्रम करण्याची जिद्द अंगी असावी. नेतृत्व तेव्हाच करता येईल जेव्हा आपल्या विचारात परिपक्वता असेल. कठोर परिश्रम, वेळेचे बंधन, अचूकता, कमतरता दूर करणे असे विविध प्रश्न विद्यार्थ्यांना पडले पाहिजेत. मोठमोठ्या उद्योजकांच्या कार्याचा आदर्श डोळ्यासमोर ठेवा. त्यामुळे आपल्याला प्रेरणा मिळते.’ मोठा आदर्श डोळ्यासमोर ठेवला पाहिजे