समान संधी कक्षाचा सर्व विद्यार्थ्यांना लाभ होईल- प्रा. डॉ. सावन देशमुख

विद्यार्थी विकास कक्षाचा विद्यार्थ्यांना लाभ होईल. विद्यार्थ्यांसाठी असणाऱ्या विविध योजनांची माहिती विद्यार्थ्यांना होईल. त्यावर योग्य अंमलबजावणी होणे अपेक्षित आहे, असे प्रतिपादन संत गाडगेबाबा अमरावती विद्यापीठाचे अधिसभा सदस्य डॉ. सावन देशमुख यांनी केले. श्री शिवाजी शिक्षण संस्था द्वारा संचालित स्थानिक जे. डी. पाटील सांगळूदकर महाविद्यालय व संत गाडगे बाबा अमरावती विद्यापीठाचा विद्यार्थी विकास विभाग यांच्या संयुक्त सहकार्याने नुकतेच जिल्हास्तरीय समान संधी कक्ष समन्वयक कार्यशाळेचे आयोजन करण्यात आले होते. त्याच्या उद््घाटन प्रसंगी उद््घाटक म्हणून मार्गदर्शन करताना डॉ. देशमुख बोलत होते. अध्यक्षस्थानी प्राचार्य डॉ. अतुल बोडखे तर उद््घाटक म्हणून संत गाडगेबाबा अमरावती विद्यापीठाचे अधिसभा सदस्य डॉ. सावन देशमुख, विद्यार्थी विकास विभागाचे माजी संचालक डॉ. दिनेश सातंगे, प्रा. डॉ. हरिदास आखरे, आयक्यूएसीचे समन्वयक प्रा. मनीष होले व कार्यशाळा समन्वयक प्रा. डॉ. ज्योत्स्ना पुसाटे मंचावर उपस्थित होते. कार्यशाळेच्या प्रथम सत्राचे अध्यक्ष म्हणून इंग्रजी विभाग प्रमुख प्रा. डॉ. नरेंद्र माने, तर मार्गदर्शक म्हणून डॉ. दिनेश सातंगे उपस्थित होते. प्रथम सत्रामध्ये डॉ. सातंगे यांनी समन्वयकांनी विद्यार्थ्यांना समान संधी कक्षाच्या माध्यमातून नेहमी मार्गदर्शन करत राहावे, त्यांच्यासाठी असलेल्या योजनांची माहिती देत रहावे व महाविद्यालय स्तरावर सर्व विद्यार्थ्यांसोबतच दिव्यांग तथा वंचित विद्यार्थ्यांना पूरक अशा गोष्टी करण्यासाठी पुढाकार घ्यावा, असे आवाहन केले. डॉ. माने यांनी समान संधी कक्ष व व राष्ट्रीय सेवा योजना या माध्यमातून महाविद्यालयातील विद्यार्थ्यांच्या सर्वांगीण विकासासाठी समन्वयकांना चांगले काम करता येते. त्यासाठी सकारात्मक पुढाकार घ्यावा, असे आवाहन केले. दुसऱ्या सत्राच्या अध्यक्षस्थानी डॉ. मिलिंद भिलपवार, तर मार्गदर्शक म्हणून डॉ. हरिदास आखरे उपस्थित होते. डॉ. आखरे यांनी महाविद्यालय स्तरावर समान संधी कक्षाची भूमिका विशद केली. अध्यक्षीय भाषणात डॉ. भिलपवार यांनी वेगवेगळ्या योजनांतून वेगवेगळ्या शिष्यवृत्ती विद्यार्थ्यांपर्यंत कशा पोहचतील यासंबंधी सविस्तर माहिती दिली. समारोपीय सत्रामध्ये आयक्यूएसी समन्वयक प्रा. मनीष होले, प्रा. डॉ. मंगलावती पांडेय, वाणिज्य विभाग प्रमुख प्रा. डॉ. टी. बी. वानखडे आदी उपस्थित होते. प्रा. होले यांनी शिक्षणासोबतच विद्यार्थ्यांना कौशल्य विषयक ज्ञान अवगत करून देणे गरजेचे असल्याचे मनोगत व्यक्त केले. कार्यशाळेच्या नियोजनाबाबत तक्षशिला इंजिनिअरिंग कॉलेज दारापूरचे डॉ. बी. एस. शेटे, विनायक विज्ञान महाविद्यालय नांदगाव खंडेश्वरचे प्रा. एन. एस. पांडे यांनी अभिप्राय व्यक्त केला.कार्यशाळेचे प्रास्ताविक डॉ. ज्योत्स्ना पुसाटे, तर पाहुण्यांचा परिचय डॉ.तुषार वानखडे यांनी दिला. कार्यक्रमाचे सूत्रसंचालन प्रा. वैशाली चौरपगार, तर आभार प्रा. डॉ. संजय आगलावे यांनी मानले. कार्यशाळेला अमरावती जिल्ह्यातील समन्वयक तथा महाविद्यालयातील प्राध्यापक व विद्यार्थी उपस्थित होते. ग्रामीण विद्यार्थ्यांना समान संधी मिळावी- डॉ. बोडखे अध्यक्षीय भाषणातून प्राचार्य डॉ. अतुल बोडखे यांनी समान संधी कक्षाच्या माध्यमातून महाविद्यालयातील वंचित घटकातील विद्यार्थ्यांच्या विविध कलागुणांना समन्वयकांनी प्रोत्साहित केले पाहिजे असे आवाहन करीत ग्रामीण भागातील विद्यार्थ्यांना समान संधी मिळायला हवी, यासाठी प्रत्येक समन्वयकांनी प्रयत्न करायला पाहिजे, असे मत व्यक्त केले.