सोमवार ठरला "रॅलीवॉर'';‎सर्वांचाच जोरदार प्रचार‎:जकीय पक्षाच्या तसेच अपक्ष उमेदवारांनी प्रचार रॅलींवर भर

१८ नोव्हेंबर रोजी संध्याकाळी सहा वाजता प्रचाराच्या तोफा थंडावल्या. तत्पूर्वी शेवटच्या दिवशी सोमवारी सर्वच राजकीय पक्षाच्या तसेच अपक्ष उमेदवारांनी प्रचार रॅलींवर भर दिला होता. अकोला पूर्व व अकोला पश्चिममध्ये पक्षाचे अधिकृत उमेदवार तसेच अपक्ष उमेदवारांनी शेवटच्या दिवशी आपल्या भागातील प्रचारावर जोर दिल्याचे दिसून आले. अकोला शहरात अपक्ष उमेदवारांनी तसेच अधिकृत उमेदवारांनी रॅली काढली. सिंधी कॅम्प, जुने शहर, जठारपेठ या भागातून रॅली काढण्यात आल्याने वाहतुकीचा खोळंबा झाला होता. तसेच बाळापूर, मूर्तिजापूर तसेच अकोटमध्ये उमेदवारांचा प्रचार रॅलीचा धडाका होता. प्रचाराची सांगता म्हणून राजकीय नेत्यांनी शक्तिप्रदर्शन केले. महापुरुषांच्या पुतळ्यांना अभिवादन करुन प्रचार रॅलींची सांगता करण्यात आली. त्यानंतर उमेदवारांनी लावलेले बॅनरही काढण्यात आले. सोमवार हा शेवटच्या दिवसाचा प्रचारवार ठरला. या दिवशी अकोटमध्ये माजी मंत्री सुधाकरराव गणगणे, हिदायत पटेल, नानासाहेब हिंगणकर, माजी आमदार संजय गावंडे यांच्यासह मोठ्या नेत्यांपैकी अॅड. प्रकाश आंबेडकर यांची सभा पार पडली. तर मूर्तिजापूरमध्ये सुजात आंबेडकर यांचीही सभा पार पडली. अकोला शहरात भाजपचे खासदार अनुप धोत्रे यांच्या सभा पार पडल्या.