स्वाती बडगुजर यांचे अमरावती येथील राज्यस्तरीय विज्ञान प्रदर्शनामध्ये यश:‘एआय’च्या शैक्षणिक वापरावरील उपकरण विज्ञान प्रदर्शनामध्ये दुसरे

मुक्ताईनगर अमरावती येथे श्री शिवाजी शिक्षण संस्थेत २८ जानेवारी ते १ फेब्रुवारी रोजी ५२ वे राज्यस्तरीय विज्ञान प्रदर्शन झाले. यात प्राथमिक शिक्षक गटातून जिल्हा परिषद प्राथमिक शाळा पिंप्राळा (ता. मुक्ताईनगर) येथील प्राथमिक शिक्षिका स्वाती सुनील बडगुजर यांच्या यांच्या शैक्षणिक साहित्याला राज्यस्तरावर द्वितीय क्रमांक मिळाला. राज्यातील ३६ जिल्ह्यातून १०१ शिक्षकांनी व ३३० विद्यार्थ्यांनी आपले शैक्षणिक साहित्य प्रदर्शनात सादर केले. स्वाती बडगुजर यांच्या शैक्षणिक साहित्यास विद्यार्थी व शिक्षकांचा उदंड प्रतिसाद प्रदर्शनात मिळाला. परीक्षकांनी पारदर्शक मूल्यमापन करून स्वाती बडगुजर यांच्या शैक्षणिक मॉडेलला राज्यभरातून द्वितीय क्रमांक मिळाला. त्याबद्दल त्यांचा शिक्षण राज्यमंत्री पंकज भोयर, शिवाजी विज्ञान महाविद्यालयाचे अध्यक्ष हर्षवर्धन देशमुख यांच्या हस्ते प्रमाणपत्र व सन्मानचिन्ह, रोख रक्कम देऊन गौरव करण्यात आला. या वेळी महाराष्ट्र राज्य विज्ञान मंडळ रविनगर नागपूर येथील संचालिका हर्षलता बुराडे, विभागीय उपसंचालक अमरावती विभाग नीलिमा टाके उपस्थित होत्या. त्यांनी कौतुक केले. ज्ञानरचनावादी, कमी खर्चातील साहित्य स्वाती बडगुजर यांनी तंत्रज्ञानाचा शैक्षणिक वापर व रचनावादी स्वनिर्मित शैक्षणिक सहित्य तयार केले होते. त्यात बदलत्या काळानुसार एआयचा शैक्षणिक वापर, एआय रोबोटिक्स उत्तर देणारी जादूई पेटी, मोबाइलचा बालमनावर होणारा परिणाम, अमावस्या ते पौर्णिमा चंद्रकला, चौदाखडी चक्र, डोके चालवा काडी हलवा असे विविध ज्ञानरचनावादी विद्यार्थी उपयुक्त व कमी खर्चात साहित्य तयार करून राज्य प्रदर्शनात सादर केले. स्वाती बडगुजर यांचा सन्मान करताना शिक्षण राज्यमंत्री पंकज भोयर, शिवाजी विज्ञान महाविद्यालयाचे अध्यक्ष हर्षवर्धन देशमुख व मान्यवर.