Nashik | दिंडोरी झिरवाळांची हॅट्ट्रिक

अवघ्या जिल्ह्याचे लक्ष लागून असलेल्या दिंडोरी-पेठ विधानसभा मतदारसंघात अखेर राष्ट्रवादी अजित पवार गटाचे उमेदवार विधानसभा उपाध्यक्ष नरहरी झिरवाळ यांनी हॅट्ट्रिक साधली असून, राष्ट्रवादी शरद पवार गटाच्या उमेदवार सुनीता चारोस्कर यांचा झिरवाळांनी 44,532 मतांनी पराभव केला. झिरवाळ यांना 1,38,442 मते, तर चारोस्करांना 93,910 मते मिळाली. अपक्ष उमेदवार सुशीला चारोस्कर यांना 9694, तर संतोष रेहरे यांना 4311 मते मिळाली.

सकाळी आठ वाजता दिंडोरी येथील मविप्र कॉलेजमध्ये निवडणूक निर्णय अधिकारी आप्पासाहेब शिंदे यांच्या मार्गदर्शनाखाली मतमोजणीला सुरुवात झाली. पहिल्यांदा पोस्टल मतदानाची मोजणी करण्यात आली. त्यात झिरवाळ यांना 801 मते मिळाली, तर चारोस्कर यांना 688 मते मिळाली. पोस्टल मतांमध्ये झिरवाळांनी 113 मतांची आघाडी घेतली.

त्यानंतर ईव्हीएम मतांची मतमोजणी करण्यात आली. पहिल्याच फेरीत 942 मतांची आघाडी झिरवाळांना मिळाली. ती शेवटपर्यंत कायम राहिली. एकूण 32 फेऱ्या झाल्या. दुपारी 2 वाजता शेवटची फेरी पूर्ण झाली. त्यानंतर निवडणूक निर्णय अधिकारी आप्पासाहेब शिंदे यांनी झिरवाळांच्या विजयाची घोषणा केली. त्यानंतर झिरवाळ मतदान केंद्रावर पोहोचले, निवडणूक निर्णय अधिकाऱ्यांच्या हस्ते निवडीचे प्रशस्तिपत्रक घेऊन झिरवाळ मतदान केंद्राबाहेर येताच कार्यकर्त्यांनी फटाक्यांची आतषबाजी करत गुलालाची उधळण करून विजयोत्सव साजरा केला. यावेळी माजी आ. धनराज महाले, शिवसेना शिंदे गटाचे जिल्हाप्रमुख भाऊलाल तांबडे, कादवाचे संचालक बाळासाहेब जाधव, राष्ट्रवादी तालुकाध्यक्ष राजेंद्र उफाडे, प्रकाश शिंदे, नरेंद्र जाधव, भाजप तालुकाध्यक्ष श्याम मुरकुटे आदींसह राष्ट्रवादी, शिवसेना, भाजपचे कार्यकर्ते उपस्थित होते. विजयानंतर उघड्या जिपमधून नरहरी झिरवाळांची मिरवणूक काढण्यात आली. कार्यकर्त्यांनी जेसीबीवरून मोठा हार झिरवाळांना घालत आनंदोत्सव साजरा केला.