Nashik | सिन्नरचे माणिक पाचव्यांदा विधानसभेत

सिन्नर विधासभा मतदारसंघात महायुतीचे उमेदवार आमदार अ‍ॅड. माणिकराव कोकाटे व महाविकास आघाडीचे उमेदवार उदय सांगळे यांच्यात चुरशीची लढत झाली. तथापि, आमदार कोकाटे यांनी 1,38,565 मते मिळवून सांगळे (97,681) यांच्यावर सुमारे 40 हजार 884 इतक्या प्रचंड मतांनी दणदणीत विजय मिळवला.

कोकाटे पाचव्यांदा विधासभेत पोहोचले आहेत. या निवडणुकीत सुमारे 74.85 टक्के मतदान झाले होते. त्यामुळे वाढलेला मतटक्का कोणाला धक्का देणार याबाबत मतदारसंघामध्ये चर्चा सुरू होती. सत्ताधारी महायुतीचे आमदार म्हणून माणिकराव कोकाटे यांनाच वाढलेल्या मतदानाचा फायदा झाल्याचे दिसून आले. पहिल्या फेरीपासूनच आमदार कोकाटे यांनी आघाडी घेण्यास सुरुवात केली होती. मतांची ही आघाडी 16 व्या फेरीपर्यंत 42,366 पर्यंत पोहोचली होती. ती 17 ते 31 या फेर्‍यांदरम्यान रोखून धरण्यात उदय सांगळे यांना काहीसे यश आले. मात्र पिछाडीने त्यांची पाठ सोडली नाही. तोपर्यंत आमदार कोकाटे मोठे मताधिक्य घेत विजयासमीप पोहोचले होते. त्यांच्या केवळ औपचारिक विजयाची घोषणा राहिली होती. विजय समोर दिसू लागताच कार्यकर्त्यांनी गुलालाची उधळण, फटाक्यांची आतषबाजी करण्यास सुरुवात केली. विजयी घोषणाही सुरू केल्या होत्या. 23 व्या फेरीची मतमोजणी सुरू असताना मतमोजणीस्थळी आमदार कोकाटे यांचे आगमन झाले. विजयाची घोषणा झाल्यानंतर निवडणूक निर्णय अधिकारी रवींद्र भारदे, सहायक निवडणूक निर्णय अधिकारी सुरेंद्र देशमुख यांच्या हस्ते प्रमाणपत्र प्रदान करण्यात आले. निवडणूक निरीक्षक गायत्रीदेखील उपस्थित होत्या.