NCP वडगाव शेरीची भाजपला जागा सोडणार?:अजित पवारांची देवेंद्र फडणवीसांशी चर्चा; पवारांनी सुनील टिंगरेंना घेतले होते फैलावर

राष्ट्रवादी काँग्रेस शरदचंद्र पवार पक्षाचे पक्षाध्यक्ष शरद पवार यांनी वडगाव शेरी विधानसभा मतदारसंघातील एका सभेद्वारे अजित पवारांच्या राष्ट्रवादीचे स्थानिक आमदार सुनील टिंगरे यांच्याविरोधात दंड थोपटले होते. त्यामुळे त्यांची जागा संकटात सापडल्याची चर्चा सुरू असताना राष्ट्रवादीने ही जागा भाजपला सोडण्याचा निर्णय घेतल्याची माहिती आहे. यासंबंधी उपमुख्यमंत्री अजित पवार व देवेंद्र फडणवीस यांच्यात संवाद झाल्याचीही चर्चा आहे. या घटनाक्रमामुळे पवारांनी महायुतीला चांगलाच घाम फोडल्याची चर्चा रंगली आहे. शरद पवार यांनी नुकतीच सुनील टिंगरे यांच्या वडगाव शेरी मतदारसंघात सभा घेतली होती. या सभेत त्यांनी पुणे पोर्शे प्रकरणात वादग्रस्त ठरलेल्या आमदार टिंगरे यांचा चांगलाच समाचार घेतला होता. ते म्हणाले होते, की येताना बोर्ड पाहिला, आमचे आमदार दमदार. मी चौकशी केली हा आमदार दमदार काय भानगड आहे? नाव काय त्यांचे तर टिंगरे.. अरे बाबा तू कुणाच्या तिकिटावर निवडून आलास? त्यावेळेला तुझ्या पक्षाचा नेता कोण होता? राष्ट्रवादी काँग्रेसची स्थापना कोणी केली? हे समस्त देशाला माहित आहे. त्या पक्षाच्यावतीने तुला संधी दिली. तू काम करशील अशी अपेक्षा केली. तू सोडून गेलास ते ठीक, पण तुझा काय बंदोबस्त करायचा आहे ते नागरिक करतील. त्याची बिलकुल चिंता नाही. पण निदान चुकीच्या गोष्टींना पाठिंबा तरी देत जाऊ नकोस, असे शरद पवार म्हणाले होते. अजित पवारांची फडणवीसांशी चर्चा शरद पवार यांच्या या विधानानंतर सुनील टिंगरे यांची जागा संकटात सापडल्याची चर्चा आहे. त्यानुसार, अजित पवारांनी तातडीने या प्रकरणी भाजप नेते तथा उपमुख्यमंत्री देवेंद्र फडणवीस यांच्याशी चर्चा केली. या दोन्ही नेत्यांच्या चर्चेत वडगाव शेरीची जागा बदलण्याच्या मुद्यावर चर्चा झाली. त्यात वडगाव शेरीची जागा भाजपला देण्याच्या मुद्यावर मतैक्य झाल्याची माहिती आहे. सूत्रांच्या माहितीनुसार, वडगाव शेरी विधानसभा मतदारसंगात नव्याने सर्व्हेही सुरू करण्यात आला आहे. या सर्व्हेतून नवा उमेदवार ठरवला जाण्याची शक्यता आहे. या मतदारसंघात जगदीश मुळीक यांनीही तयारी सुरू केली आहे. त्यांच्या हालचालींत सध्या मोठी वाढ झाल्यामुळे वडगाव शेरीत मोठ्या घडामोडी घडत आहेत. त्यामुळे सुनील टिंगरे यांना घरी बसवून मुळीक यांना महायुतीची उमेदवारी मिळण्याची शक्यता व्यक्त केली जात आहे.