Parbhani Accident: मोटारसायकल-कार अपघात; एकाचा मृत्यू

परभणी-गंगाखेड रोडवर पोखर्णी फाटा येथील घटना
अपघातात एक जखमी

परभणी/दैठणा (Parbhani Accident) : परभणी तालुक्यातील पोखर्णी फाटा येथे एका बार समोर दुचाकी – चारचाकीचा अपघात झाल्याची घटना शुक्रवार ३१ जानेवारी रोजी दुपारच्या सुमारास घडली. या अपघातात दुचाकीवरील एकाचा मृत्यू झाला तर इतर एक जण गंभीर जखमी झाला आहे.

या अपघाताविषयी अधिक माहिती अशी की, ताडपांगरी येथील एक युवक त्याच्या (Parbhani Accident) परभणी येथील मित्रासोबत एम.एच. २२ जे ५४५७ या दुचाकीने परभणीहून पोखर्णी फाटा येथे येत होता. यावेळी गंगाखेडकडून भरधाव वेगाने परभणीच्या दिशेने जाणार्‍या एम.एच. ४४ व्ही. ०९२७ या वाहनासोबत अपघात झाला. अपघातात दुचाकी वरील बाळू इनामदार वय २५ वर्ष, रा. परभणी हा युवक जवळपास २० फुट उंच उडाला.

डोक्याला गंभीर मार लागल्याने त्याचा जागीच मृत्यू झाला. तर विशाल नंदकुमार रासवे वय २३ वर्ष, रा. ताडपांगरी हा युवक गंभीर जखमी झाला. त्याला खाजगी वाहनाद्वारे उपचारासाठी परभणीला पाठविण्यात आले. (Parbhani Accident) अपघाताची माहिती समजताच सपोउपनि. नागनाथ फड, अमोल डुबे यांनी घटनास्थळी धाव घेतली. दरम्यान या रस्त्यावर मागील काही दिवसात अपघाताच्या घटना वाढल्या असल्याचे दिसत आहे. भरधाव वेगातील वाहनामुळे अपघात घडत आहेत. या अपघातात निष्पाप नागरीकांना आपला जीव गमवावा लागत आहे.