’جمہوریت کو بااختیار بنانے کیلئے شکریہ‘

عظمیٰ نیوز سروس

سرینگر //لیفٹیننٹ گورنر منوج سنہا نے کہا ہے”میں جموں و کشمیر کے میں جمہوریت کو بااختیار بنانے اور مضبوط کرنے کے لئے لوگوں کا شکریہ ادا کرتا ہوں‘‘۔ایک بیان میں کہا گیا ہے کہ میں بیلٹ کے تقدس کو برقرار رکھنے اور شفاف، آزادانہ اور منصفانہ انتخابات کو کامیابی کے ساتھ مکمل کرنے کے لیے انتھک اور تندہی سے کام کرنے کے لیے سی ای او ، الیکشن کمیشن کے حکام، جموں کشمیر پولیس اور سیکورٹی فورسز کی کاوشوں کی تعریف کرتا ہوں۔انکا کہنا ہے ’’انتخابات میں جیت کے لیے قانون ساز اسمبلی اور این سی کی قیادت والے اتحاد کے لیے منتخب ہونے والے تمام اراکین کو میری دلی مبارکباد۔ عوام کی خدمت میں ان کے لیے نیک خواہشات، ہندوستان کا آئین ہماری رہنمائی کی روشنی ہے اور میں سب سے گزارش کرتا ہوں کہ وہ جموں و کشمیر کی ترقی اور لوگوں کی فلاح و بہبود کے لیے مل کر کام کریں‘‘۔بیان کے مطابق’’پرامن انتخابی عمل اور لاکھوں ووٹروں کی شرکت متحرک جمہوریت اور ملک کی جمہوری اقدار پر عوام کے اعتماد کا منہ بولتا ثبوت ہے، آج جموں و کشمیر گڈ گورننس، عوام اول، سماجی انصاف اور سماجی ہم آہنگی کے اصولوں کی رہنمائی میں اونچا کھڑا ہے‘‘۔