ریاسی میں ڈسٹرکٹ ڈیولپمنٹ کوارڈی نیشن اینڈ مانیٹرنگ کمیٹی کی میٹنگ

عظمیٰ نیوز سروس

ریاسی//ممبر پارلیمنٹ جموں ،سانبہ ۔ریاسی جگل کشور شرما نے ڈسٹرکٹ ڈیولپمنٹ کوآرڈی نیشن اینڈ مانیٹرنگ کمیٹی کی میٹنگ کی صدارت کی۔میٹنگ میں مرکزی اسپانسر شدہ مختلف اسکیموں اور ضلع میں جاری ترقیاتی منصوبوں کی پیش رفت کا جائزہ لینے پر توجہ مرکوز کی گئی۔میٹنگ کے دوران ایم پی نے ریاسی میں جاری تمام مرکزی اسپانسر شدہ اسکیموں کے جسمانی اور مالیاتی جائزہ کا تفصیلی جائزہ لیا۔میٹنگ کے دوران افسران سے خطاب کرتے ہوئے جگل کشور نے روشنی ڈالی کہ ریاسی ہمہ گیر ترقی کے لئے تیار ہے۔انہوں نے عہدیداروں کو ہدایت دی کہ وہ اپنے اہداف کو مقررہ مدت کے اندر مکمل کریں تاکہ استفادہ کنندگان کو بروقت خدمات مل سکیں۔ انہوں نے محکموں کے درمیان باہمی تعاون پر بھی زور دیا تاکہ منصوبوں کی بروقت تکمیل کو یقینی بنایا جا سکے خاص طور پر سڑکوں کے بنیادی ڈھانچے، تعلیم، صحت اور انجینئرنگ کے کاموں سے متعلق منصوبوں پر توجہ دی گئی ۔انہوں نے عوامی خدمات کی فراہمی کو بڑھانے کے لئے عہدیداروں اور عوامی نمائندوں کے اجتماعی فیلڈ دوروں کی ضرورت کو اجاگر کیا۔ایم پی نے افسران کو ہدایت دی کہ وہ پروجیکٹ کی ٹائم لائن پر عمل کریں اور میٹنگ کے دوران ڈی ڈی سی چیئرپرسن، ایم ایل ایز اور دیگر اراکین کے ذریعہ اٹھائے گئے مسائل کو حل کرنے کو ترجیح دیں۔ انہوں نے جدید ٹیکنالوجی کے استعمال کی ترغیب دی تاکہ سرکاری خدمات کی سنترپتی کو یقینی بنایا جا سکے۔ انہوں نے وسائل کے زیادہ سے زیادہ استعمال پر بھی زور دیا اور افسران پر زور دیا کہ وہ جاری ترقیاتی کاموں کی پیش رفت کی نگرانی اور پیروی کریں۔میٹنگ کے دوران، ڈپٹی کمشنر، ویشیش مہاجن نے مختلف سی ایس ایس اقدامات کی کامیابیوں اور پیشرفت کے بارے میں ایک جامع پریزنٹیشن دی، اس کے ساتھ ساتھ ریاسی میں دہلی-امرتسر- کٹرہ ایکسپریس وے، چناب پل، انجی پل اور دیگر جیسے اہم ترقیاتی پروجیکٹوں کی حیثیت کے بارے میں بھی جانکاری فراہم کی گئی ۔