کھیلوں کے خواہشمند کھیتوں میں کھیلنے پر مجبور

تعمیر ات کے نام پر کروڑوں روپے خرچ کرنے کے بعد بھی کھلاڑی ناراض ،انتظامیہ سے توجہ کی مانگ

محمد بشارت

کوٹرنکہ //کوٹرنکہ سب ڈویژن میں کے دیہات میں اس جدید دور کے دوران بھی انتظامیہ کی جانب سے بچوں کے کھیل کود کیلئے معیاری سہولیات دستیاب نہیں کروائی گئی ہیں جس کی وجہ سے کھیلوں کے خواہشمند نوجوان کھلاڑی لوگوں کے کھیتوں میں کھیلنے پر مجبور ہیں ۔مقامی لوگوں نے محکمہ دیہی ترقی کیساتھ مقامی اور ضلع انتظامیہ کو تنقید کا نشانہ بناتے ہوئے کہاکہ سی ڈی بلاک بدھل اولڈ اے کوٹرنکہ ،سی ڈی بلاک خواص،سی ڈی بلاک بدھل نیو کے صدر مقام پر یا پھر متعداد پنچایتوں میں کھیل کود کے میدان دستیاب نہیں ہیں۔مقامی لوگوں نے بتایا کہ کوٹرنکہ سب ڈسٹرکٹ کے مختلف دیہات میں کھیل کے میدان کی عدم موجودگی نے علاقے کے نوجوان اور باصلاحیت کھلاڑیوں کے لئے سنگین مسائل پیدا کر دیے ہیں۔ یہ نوجوان جو اپنے کھیل کے ہنر کو نکھار کر علاقے کا نام روشن کرنا چاہتے ہیں، سہولیات کی کمی کی وجہ سے اپنی صلاحیتوں کو محدود محسوس کرتے ہیں۔کوٹرنکہ سب ڈسٹرکٹ کے کئی دیہات میں کوئی بھی مناسب کھیل کا میدان دستیاب نہیں ہے۔ نوجوان کھلاڑی مجبوراً وہ مقامات استعمال کرتے ہیں جو عارضی طور پر کھیل کیلئے موزوں بن جاتے ہیں، جیسے کہ کھیت جب ان میں فصل کاشت نہیں کی جا رہی ہوتی لیکن یہ حل عارضی اور ناکافی ہے کیونکہ ان مقامات میں نہ تو مناسب جگہ ہوتی ہے اور نہ ہی کھیل کے لئے ضروری سہولیات دستیاب ہوتی ہیں۔کھلاڑیوں کو کھیلنے کے لئے موزوں جگہ نہ ہونے کی وجہ سے مختلف قسم کے مسائل کا سامنا کرنا پڑتا ہے،۔نوجوان کھلاڑیوں نے بتایا کہ کھیل کے میدان نہ ہونے کی وجہ سے کھیل کے لئے مستقل اور مناسب جگہ نہ ہونے کی وجہ سے کھلاڑی اپنی تربیت کو جاری نہیں رکھ سکتے۔انہوں نے بتایا کہ فصلوں کے میدان میں کھیلنے کے دوران کئی بار کھلاڑیوں کو چوٹ لگنے کا خطرہ ہوتا ہے کیونکہ یہ جگہ کھیل کے لئے تیار نہیں ہوتی۔انہوں نے کہاکہ نہ تو میدان میں کوئی نشان لگانے کا نظام ہے اور نہ ہی دیگر بنیادی سہولیات جیسے کہ نیٹ، گول پوسٹ یا بیٹھنے کی جگہ موجود ہے۔سب ڈویژن کے نوجوان کھلاڑیوں نے بتایاکہ جب زمین گندی یا کیچڑ سے بھر جاتی ہے تو کھیلنا مزید مشکل ہو جاتا ہے، اور کھلاڑیوں کو اپنی تربیت روکنی پڑتی ہے۔سماجی کارکنوں نے بتایا کہ علاقہ میں کھیل کا بنیادی ڈھانچہ مضبوط نہ ہونے کی وجہ سے نوجوان منشیات و دیگر غلط راستوں کو اختیار کررہے ہیں ۔کوٹرنکہ اور اس کے دیہات میں کھیل کے میدان کی موجودگی نہ صرف کھلاڑیوں کے لئے فائدہ مند ہوگی بلکہ یہ پورے علاقے کے لیے بھی کئی فوائد فراہم کرے گی۔نوجوانوں کی سرگرمیوں کا مرکز: کھیل کے میدان کے ذریعے نوجوان منفی سرگرمیوں سے بچ سکیں گے اور اپنی توانائی مثبت مقاصد کے لئے استعمال کریں گے۔کھیل کے میدان سے علاقے کے باصلاحیت کھلاڑی اپنی مہارتوں کو بہتر بنا سکیں گے اور بڑے مقابلوں میں حصہ لینے کے لئے تیار ہوں گے۔علاقہ مکینوں نے کہاکہ ’’انتظامیہ کو اس مسئلے کی سنگینی کا احساس ہونا چاہیے۔ اگر ہمارے دیہات میں کھیل کے میدان موجود ہوں گے تو یہ نوجوان نسل کی ترقی کیلئے بہت مفید ہوگا‘‘۔مقامی لوگوں نے مانگ کرتے ہوئے کہاکہ مرکزی علاقوں کی نشاندہی کر کے دیہی علاقوں میں کھیل کے میدان تعمیر کروائے جائیں تاکہ نوجوانوں کو کھیل کی سہولیات میسر ہو سکیں ۔