अकोला नाक्यावर भरधाव ट्रकने चिरडल्याने 11 वर्षीय मुलगी ठार:दुसऱ्या दिवशी अकोट शहरात सर्वपक्षीयांतर्फे रास्ता रोको

दर्यापूर मार्गावरून अकोला नाक्याकडे येताना पुलावर रविवारी झालेल्या अपघातात एका ११ वर्षीय चिमुकलीला आपला जीव गमवावा लागला. या घटनेनंतर रात्री मोठा जमाव अकोला नाका परिसरात जमा झाला होता. मृतदेह रस्त्यावरच ठेवून आरोपीच्या अटकेसाठी संतप्त जमावाने ठिय्या दिला. घटनास्थळी तणावसदृश परिस्थिती निर्माण झाली होती. मात्र, आरोपीला अटक केल्यानंतर नातेवाइकांनी मृतदेह ताब्यात घेतला. दरम्यान, दुसऱ्या दिवशी सोमवारी व्यवस्थेच्या निष्क्रियतेविरोधात अकोट शहरात सर्वपक्षीय रास्ता रोको करण्यात आला होता. २ फेब्रुवारी रोजी रात्री १० च्या सुमारास सिंधी कॅम्प परिसरात राहणारे दीपक जेसवानी आपल्या दोन मुलींसह (एम.एच ७८४) या दुचाकीने दर्यापूर मार्गावरून अकोला नाक्याकडे येत होते.दरम्यान याच वेळी वैरण(चारा) घेऊन दर्यापूरकडून शहराकडे येत असलेले मालवाहू वाहन (एम.एच.- २७ झेड ७४०९) अकोला नाक्यावरील पुलावर चढत होते. यावेळी ट्रकने दिलेल्या धडकेत दुचाकींचा अपघात होऊन ११ वर्षीय नम्रता ट्रक खाली चिरडल्या गेली. वाहनाचे चाक डोक्यावरून गेल्याने तिचा घटनास्थळीच मृत्यू झाला. उर्वरित पान ४ उड्डाणपुलावर काळोख अकोला नाक्यावर ज्या ठिकाणी अपघात झाला त्या ठिकाणी नेहमी काळोखाचे साम्राज्य असते. संबंधित विभागाच्या बेजबाबदारपणामुळे या ठिकाणी अनेकदा अपघात घडून अनेकांना कायमचे अपंगत्व आले आहे. "ब्लॅक स्पॉट' असलेला हा भाग प्रशासनाचे कामचुकारपणामुळे अनेकांच्या अपघातास कारणीभूत ठरत आहे.