अमरावती : ट्रक-टेम्पोचा भीषण अपघात; ३ मजूर ठार, ६ जखमी

अमरावती, पुढारी वृत्तसेवा: आयशर ट्रक आणि पिकअप बोलेरो वाहनाच्या धडकेत तीन जण ठार तर सहा जण गंभीर जखमी झाले. हा अपघात बुधवारी ( दि. 27) रात्रीच्या सुमारास वरुड-अमरावती मार्गावर लाखारा फाट्या नजीक झाला. अपघातात अचलपूर येथील दोघांचा तर पांढरघाटी येथील एकाचा मृत्यू झाल्याची माहिती आहे.

मृतांमध्ये राजेश रमेश युवनाते वय (20), तौफिक शहा फारुक शहा (वय 32) आणि शेख नजीम शेख साबीर (वय 40) यांचा समावेश आहे. गंभीर जखमींना पुढील उपचारासाठी नागपूर येथे हलविण्यात आले आहे. किरकोळ जखमी असलेल्यांवर वरुड ग्रामीण रुग्णालयात उपचार सुरू आहे.

सविस्तर वृत्त असे की, बुधवारी रात्रीच्या सुमारास एम एच 37 एक्स 3075 क्रमांकाचा आयशर ट्रक वरुड येथून अचलपूर कडे जात होता. तर (एम एच 27 बीएक्स 91 71) पिकअप वाहन मोर्शीवरून वरुडकडे जात होते. दरम्यान बेनोडा शहीद पोलीस स्टेशन अंतर्गत येणाऱ्या अमरावती मार्गावरील लाखारा फाट्याजवळ दोन्ही वाहनांची समोरासमोर धडक झाली. अपघात एवढा भीषण होता की, दोन्ही वाहनातील तीन मजुरांचा जागीच मृत्यू झाला. तर सहा जण गंभीर जखमी आहेत.