आदर्श भारतीय नागरिक म्हणून नावलौकिक होईल:असे काम करा, प्राचार्य अल्फोंसा डी. यांचे प्रतिपादन, अभिनव संकुलात कार्यक्रमाला प्रतिसाद‎

मुले म्हणजे बागेतील फुलेच आहेत. शैक्षणिक व सर्वच क्षेत्रांत त्यांना हवे तसे फुलू द्यायचंय व उमलू द्यायचंय. ज्या क्षेत्रात त्याची आवड निर्माण होऊ शकेल, त्या क्षेत्रात त्याने नैपुण्य आत्मसात करून एक चांगला माणूस व आदर्श भारतीय नागरिक म्हणून नावलौकिक प्राप्त होईल, असे काम करावे, असे आवाहन प्राचार्य अल्फोंसा डी. यांनी केले. अकोल्यातील अभिनव शिक्षण संकुलातील संस्थेच्या विभागवार सर्व शाळांत बालदिन साजरा करण्यात आला. यानिमित्त अभिनव शिक्षण संस्थेच्या मारूतीराव अभिनव पब्लिक स्कूलमधे उपक्रम घेण्यात आले. यानिमित्त अर्वी नाईकवाडी, आरोही हांडे, सई ढोकरे, दर्शन चौधरी, उत्कर्ष भोर या विद्यार्थ्यांचीही भाषणे झाली. तसेच स्कूलमध्ये आनंद मेळाव्याचे आयोजन केले. यात विद्यार्थ्यांनी भाजीपाला, फळ विक्री, खाऊ गल्ली, मनोरंजनात्मक खेळ यांचेही आयोजन केले. यानिमित्त वेशभूषा, मातीकाम आदींसह विविध स्पर्धांचे आयोजन करण्यात आले. विद्यार्थ्यांनी याचा आनंद घेतला. संस्थेच्या वसुंधरा अकॅडेमी कॅम्पस च्या डायरेक्टर तथा प्राचार्य डॉ. जयश्री देशमुख यांच्या मार्गदर्शनाखाली बालदिन मोठ्या उत्साहात झाला. विद्यार्थ्यांच्या वयोगटानुसार नानाविध उपक्रम घेण्यात आले. पहिली ते चौथी इयत्तेतील विद्यार्थ्यांसाठी विविध मनोरंजनात्मक खेळ तसेच मॉम अँड मी, डॅड अँड मी हे कार्यक्रम सादर करण्यात आले. पालकांचा सहभाग असलेली फॅन्सी ड्रेस स्पर्धा घेण्यात आली. या स्पर्धेत पालकांनी उत्स्फूर्तपणे सहभाग घेतला. या स्पर्धेत सुमित उत्तम पवार व त्याची आई रत्नमाला पवार यानी प्रथम क्रमांक पटकावला. हृदयी चव्हाण व तिची आई ऋतुजा चव्हाण यांनी द्वितीय क्रमांक व सिद्धी अविनाश देशमुख व तिची आई शितल देशमुख यांनी तृतीय क्रमांक पटकावला. विजेत्यांना डॉ.जयश्री देशमुख यांच्या हस्ते पारितोषिके प्रदान करण्यात आली. स्पर्धेचे परीक्षण प्रा. राधिका नवले, प्रा. कुसुम वाकचौरे व मनीषा आभाळे यांनी केले. एकपात्री प्रयोगांमध्ये विद्यार्थ्यांनी प्रतिसाद दिला. एकपात्री प्रयोग स्पर्धेत दिग्विजय विक्रम नवले प्रथम, श्रेया धनराज वाकचौरे द्वितीय, कस्तुरी दीपक राऊत तृतीय तसेच निशांत सुदाम सोनवणे उत्तेजनार्थ या विजेत्या स्पर्धकांना पारितोषिके देण्यात आली. इंद्रभान कोल्हाळ, सोनिया नवले व आदिती फापाळे यांनी परीक्षक म्हणून काम पाहिले. मतदार जनजागृतीसाठी उद्बोधक पथनाट्य अकोले तहसीलदार व शिक्षण विभाग यांच्यामार्फत आयोजित प्रभात फेरीत मारुतराव कोते अभिनव पब्लिक स्कूल व वसुंधरा अकॅडमीच्या विद्यार्थ्यांनी सहभाग घेतला प्रभात फेरी झाल्यानंतर विद्यार्थ्यांनी मतदार जनजागृती करण्यासाठी उद्बोधक पथनाट्य सादर केले. संकुलातील प्री स्कूलच्या विद्यार्थ्यांसाठी प्रा. राधिका नवले यांनी रामेश्वर येथे वनभोजन व छोट्या सहलीचेआयोजन केले होते.