आदिवासी समाजाचा संताप फुटला:राष्ट्रपतींविषयी सोनिया-राहुल गांधींच्या अपमानजनक टिप्पणीविरोधात अमरावतीत जोरदार आंदोलन

अमरावतीत आज आदिवासी समाजाने राष्ट्रपती द्रौपदी मुर्मू यांच्याविषयी काँग्रेस नेते सोनिया आणि राहुल गांधी यांनी केलेल्या वादग्रस्त टिप्पणीविरोधात जोरदार आंदोलन केले. बिरसा क्रांतीदलाचे जिल्हाध्यक्ष प्रा. कमलनारायण उईके यांच्या नेतृत्वाखाली शेकडो आदिवासी बांधवांनी इर्विन चौकातील डॉ. बाबासाहेब आंबेडकर पुतळ्यापासून जिल्हाधिकारी कार्यालयापर्यंत मोर्चा काढला. संसदेच्या अर्थसंकल्पीय अधिवेशनात राष्ट्रपतींच्या अभिभाषणानंतर सोनिया गांधींनी 'पुअर लेडी' तर राहुल गांधींनी 'बोअरिंग' असे शब्द वापरल्याने देशभरात संताप व्यक्त होत आहे. आदिवासी समाजाचे प्रतिनिधित्व करणाऱ्या राष्ट्रपतींचा अशाप्रकारे अपमान केल्याबद्दल निषेध करण्यात आला. आंदोलनादरम्यान आदिवासी समाजाच्या इतर मागण्यांचाही पाठपुरावा करण्यात आला. यामध्ये मेळघाटवगळता ५०% पेक्षा जास्त आदिवासी लोकसंख्या असलेल्या गावांमध्ये पेसा कायदा लागू करणे, धारणी येथील प्रकल्प कार्यालय अमरावतीत स्थलांतरित करणे, वरुड येथे आदिवासी विद्यार्थ्यांसाठी वसतिगृह उभारणे आणि अपर आदिवासी कार्यालयाच्या न्यूक्लीअस बजेटमध्ये नावीन्यपूर्ण बदल करण्याची मागणी करण्यात आली. मोर्चात जिल्ह्यातील विविध आदिवासी संघटनांचे पदाधिकारी व कार्यकर्ते मोठ्या संख्येने सहभागी झाले होते.