आमदाराच्या विजयी मिरवणुकीवेळी आगीचा भडका:गुलाला उधळताना झालेल्या दुर्घटनेत 34 जण जखमी

विधानसभा निवडणुकीचा निकाल जाहीर झाल्यानंतर काढण्यात आलेल्या विजयी मिरवणुकीत आगीचा भडका उडाल्याची घटना घडली आहे. महागाव येथे शनिवारी रात्रीच्या सुमारास ही घटना घडली. या दुर्घटनेत चंदगड मतदारसंघाचे नवनियुक्त अपक्ष आमदार शिवाजी पाटील यांच्यासह 34 जण जखमी झाले. या घटनेचा व्हिडिओ व्हायरल झाला आहे. महागाव येथे अपक्ष उमेदवार शिवाजी पाटील यांची विजयी मिरवणूक काढण्यात आली. या मिरवणुकीत महिला नवनिर्वाचित आमदारांची आरती करत असताना समर्थकांनी बुलडोझरमधून गुलालाचा वर्षाव केला. गुलाल आरतीच्या ताटावर पडताच आगीचा मोठा भडका उडाला. या दुर्घटनेत नवनियुक्त आमदार शिवाजी पाटील यांच्यासह काही महिलांसह 34 जण जखमी झाल्याची माहिती मिळाली आहे. शिवाजी पाटील यांचा 24 हजार 134 मतांनी विजय अपक्ष उमेदवार शिवाजी पाटील यांनी विधानसभा निवडणुकीत चंदगड मतदारसंघातून 24 हजार 134 मतांनी विजय मिळवला. या मतदारसंघात त्यांनी 84 हजार 254 मते मिळवली आहेत. त्यांनी राष्ट्रवादीच्या (अजित पवार) नागेश पाटील (60 हजार 120 मते) आणि राष्ट्रवादीच्या (शरद पवार) नंदाताई बाभूळकर-कुपेकर (47 हजार 259 मते) यांचा पराभव केला आहे. महायुतीकडून मविआचा दारुण पराभव यंदाच्या विधानसभा निवडणुकीत महायुतीने इतिहास घडवला आहे. 1972 मध्ये काँग्रेसला सर्वाधिक 222 जागा मिळाल्या होत्या. हा विक्रम 230 जागा जिंकून महायुतीने मोडला आहे. विधानसभा निवडणुकीत महायुतीला 230 जागांवर घवघवीत यश मिळाले. यामध्ये भाजपला 132, शिवसेना 57 आणि अजित पवारांच्या राष्ट्रवादी 41 जागांवर निवडून आली आहे. तर महाविकास आघाडीला 48 जागांवर समाधान मानावे लागले. काँग्रेसला 16, ठाकरेंच्या शिवसेनेला 20 आणि शरद पवारांच्या राष्ट्रवादीला 10 जागांवर यश मिळवता आले. इतर घटक पक्षांनी 10 जागा जिंकल्या. ऐतिहासिक यशासह भाजपच सर्वात मोठा पक्ष बनल्याने देवेंद्र फडणवीस हे मुख्यमंत्रिपदाचे प्रबळ दावेदार आहेत. शिंदेसेना व अजित पवारांच्या राष्ट्रवादीला उपमुख्यमंत्रिपद मिळू शकते.