‘आरपीएफ'च्या जवानांनी ५८६ बांगलादेशी ; ३१८ रोहिंग्यांना पकडले

नवी दिल्ली : रेल्वे संरक्षण दलाने (आरपीएफ) २०२१ पासून ५८६ बांगलादेशी आणि ३१८ रोहिंग्यांसह ९१६ जणांना यशस्वीरित्या पकडले आहे. जून आणि २०२४ मध्ये, आरपीएफने ईशान्य फ्रंटियर रेल्वे अंतर्गत भागात ८८ बांगलादेशी आणि रोहिंग्या स्थलांतरितांना पकडले. यापैकी काही व्यक्तींनी बेकायदेशीरपणे भारतात प्रवेश केल्याची कबुली दिली. कोलकातामध्ये रेल्वेने प्रवास करताना त्यांना अडवण्यात आले, अशी माहिती रेल्वे मंत्रालयाने दिली आहे.

ऑक्टोबर २०२४ मध्ये, बांगलादेश सीमेवर वाढलेल्या सुरक्षा उपायांना न जुमानता, बेकायदेशीर स्थलांतरितानी भारतात घुसखोरी करणे सुरूच ठेवले आहे, असे रेल्वे मंत्रालयाने नमूद केले आहे. आसाममधून ही घुसखोरी होत आहे. देशाच्या इतर भागांमध्ये पोहोचण्यासाठी रेल्वे हा घुसखोरांच्या पसंतीचा मार्ग झाला आहे. या घटनांमुळे बेकायदेशीर घुसखोरीविरूद्ध रेल्वेने सुरक्षितता वाढवली आहे.

आरपीएफने सीमा सुरक्षा दल (बीएसएफ), स्थानिक पोलिस आणि गुप्तचर संस्था यांसारख्या प्रमुख सुरक्षा संस्थांच्या सहकार्याने प्रयत्न तीव्र केले आहेत. या इंटर-एजन्सी पध्दतीने कार्यक्षमतेत लक्षणीय वाढ केली आहे, ज्यामुळे बेकायदेशीर स्थलांतरीत व्यक्तीची त्वरीत ओळख आणि त्यांना ताब्यात घेण्यात आले आहे. मात्र , आरपीएफला पकडलेल्या व्यक्तींवर खटला चालवण्याचा थेट अधिकार नाही. त्याऐवजी, ताब्यात घेतलेल्या व्यक्तींना पुढील कायदेशीर कार्यवाहीसाठी पोलिस आणि इतर अधिकृत संस्थांकडे ताब्यात दिले जाते.

बांगलादेश आणि म्यानमार सारख्या शेजारील देशांमध्ये अलीकडील राजकीय घटनांमुळे, या प्रदेशांमधील भौगोलिक-राजकीय घडामोडीमुळे आणि सामाजिक-धार्मिक परिस्थितीमुळे भारतात आश्रय, रोजगार शोधणाऱ्या घुसखोरांचा ओघ वाढला आहे. राष्ट्रीय सुरक्षेसाठी ही एक चिंता आहे. रेल्वेचा वापर करणाऱ्या घुसखोरांच्या संख्येची नेमकी आकडेवारी मर्यादित असली तरी, अलीकडील अहवाल असे सूचित करतात की अवैध स्थलांतरित भारताच्या इतर भागांमध्ये जाण्यासाठी आसाम आणि त्रिपुरा सारख्या प्रदेशांतून मार्गक्रमण करण्यासाठी अनेकदा रेल्वेचा वापर करतात, असे मंत्रालयाने म्हटले आहे.