उपमुख्यमंत्री एकनाथ शिंदेंना युवक काँग्रेसने दाखवले काळे झेंडे

जालना येथील मंठा चौफुली भागात युवक काँग्रेसच्या पदाधिकाऱ्यांनी शनिवारी सायंकाळी सहा वाजता उपमुख्यमंत्री एकनाथ शिंदे यांना काळे झेंडे दाखवले.

उपमुख्यमंत्री शिंदे आज जालना शहराच्या दौऱ्यावर आहेत. दत्त मंदिराकडून लोणीकर यांच्या निवासस्थानाकडे जात असताना मंठा चौफुली भागात काँग्रेस कार्यकर्त्यांनी त्यांना काळे झेंडे दाखवत त्यांचा निषेध नोंदवला. लाडक्या बहिणींना 2100 रुपये देण्याची मागणी काळे झेंडे दाखवणाऱ्या कार्यकर्त्यांची आहे. लाडक्या बहिणींना निवडणुकीत 2100 रुपये देण्याची घोषणा करून लाडक्या बहिणींची सरकारने फसवणूक केल्याचा आरोप आंदोलकांनी केला. शहरातील नागरी समस्यांचा तात्काळ निपटारा करावा तसेच मोती तलावात तथागत भगवान गौतम बुद्धांचा प्रलंबित पुतळा बसवण्यात यावा, या मागण्यांसाठी उपमुख्यमंत्री शिंदे यांच्या ताफ्याला काळे झेंडे दाखवून त्यांचा निषेध केला. यावेळी युवक काँग्रेसचे सचिव तथा डॉ. बाबासाहेब आंबेडकर सोशल फोरमचे जिल्हाध्यक्ष शेषराव जाधव, दीपक गायकवाड, सूरज चक्रे, संतोष वाघमारे, सुखदेव उगले आदींची उपस्थिती होती.