कर्करोग निदान झालेले 65% रुग्ण 5 वर्षांपेक्षा जास्त जगतात:नॅशनल कॅन्सर इन्स्टिट्यूटच्या अभ्यासातून निघाले दिलासादायक निष्कर्ष

जगभरात स्तनांचा कर्करोग हा सध्याच्या घडीला सर्वाधिक आढळणारा कर्करोग ठरला आहे. यामुळे होणाऱ्या मृत्यूंचा आकडा २०४० पर्यंत वर्षाला दहा लाखांपर्यंत जाऊ शकतो, असा अंदाज नवीन लॅन्सेट आयोगाने मांडला आहे. तर कर्करोगाचे निदान झालेले सुमारे ६५% रुग्ण ५ वर्षांपेक्षा जास्त काळ जगतात, असे नागपुरातील नॅशनल कॅन्सर इन्स्टिट्यूटचे संचालक डाॅ. आनंद पाठक यांनी सांगितले. लोकांमध्ये आरोग्य साक्षरता आणि कर्करोगाविषयी जागरूकता वाढत आहे. तपासणीसाठी लोकांची संख्या वाढत आहे. स्तनाचा कर्करोग हा महिलांमध्ये सर्वात सामान्य कर्करोग आहे. गर्भाशयाचा कर्करोग असामान्य आहे आणि तो सामान्यतः लठ्ठ मधुमेही महिलांमध्ये आणि अनुवांशिक पूर्वस्थिती असलेल्यांमध्ये आढळतो, असे डाॅ. पाठक यांनी सांगितले. नागपुरातील नॅशनल कॅन्सर इन्स्टिट्यूटचे संचालक व ख्यातनाम कर्करोग उपचार विशेषज्ञ डाॅ. अानंद पाठक यांनी दिलेल्या माहितीनुसार, एनसीआयमध्ये सुरुवातीला येणाऱ्यांचे प्रमाण २५% आहे. दुर्मिळ मानले जाणारे कर्करोगाचे इम्युनोहिस्टोकेमिस्ट्री आणि आण्विक प्रोफायलिंगसारख्या वाढत्या निदान क्षमतांमुळे त्यांचे निदान वाढत आहे. कर्करोगात स्टेज १ आणि २ सारख्या सुरुवातीच्या टप्प्यात जगण्याची शक्यता अधिक वाढते, असे डाॅ. आनंद पाठक यांनी सांगितले. स्तनाचा कर्करोग, स्त्रीरोगविषयक कर्करोग, बालपणीचा ल्युकेमिया, काही जठरांत्रीय कर्करोग, जर्म सेल ट्यूमर, लिम्फोमा, मायलोमा, फुप्फुसाचा कर्करोग आणि डोक्याच्या मानेचा कर्करोग यामध्ये जगण्याचा दर चांगला आहे. आज कर्करोगाचे निदान झालेले सुमारे ६५% रुग्ण ५ वर्षांपेक्षा जास्त काळ जगत आहेत आणि वाढत्या प्रमाणात बरे होत आहेत. कर्करोग हा मधुमेह आणि उच्च रक्तदाबसारखा जुनाट आजार झाला आहे. गेल्या तीन वर्षांत राष्ट्रीय कर्करोग संस्थेत दाखल झालेल्या रुग्णांमध्ये सामान्यत: डोके आणि मानेचे कर्करोग, त्यानंतर स्तनाचा कर्करोग, गॅस्ट्रोइंटेस्टाइनल कर्करोग, स्त्रीरोगविषयक कर्करोग, वक्षस्थळाचा कर्करोग आणि इतर होते. यामध्ये ५२ टक्के रुग्ण पुरुष होते आणि ४८% महिला होत्या. जागतिक स्तरावर १ कोटीवर आढळले रुग्ण जागतिक स्तरावर १ कोटी ९९ लाख ७६ हजार ४९९ नवे रुग्ण आढळले. त्यापैकी ९७ लाख ४३ हजार ८३२ जणांचा मृत्यू झाला. यात जगणारे ३ कोटी ३५ लाख २७ हजार ६८८ इतके होते. गेल्या पाच वर्षांत ५ कोटी ३५ लाख ०४ हजार १८७ नी यात वाढ झाली. गेल्या पाच वर्षांत ३२,५८,५१८ नी यात वाढ झाली. सामान्यत: पुरुषांमध्ये मुख कर्करोग, ओठ, फुप्फुस व अन्ननलिकेचा तर महिलांमध्ये स्तन, गर्भाशय अंडाशयाचा कर्करोग आढळतो. २०४० पर्यंत ३० लाख रुग्ण राहण्याची शक्यता आकड्यांवर नजर टाकली असता जगभरात २०१६ ते २०२० या पाच वर्षांत स्तनांच्या कर्करोगाची रुग्णसंख्या ७८ लाख होती. यापैकी ६.८५ रुग्णांचा मृत्यू झाला. लॅन्सेटच्या अभ्यासानुसार २०२० मध्ये २३ लाख रुग्ण होते. तर २०४० मध्ये अंदाजे ३० लाख रुग्ण राहतील व त्यापैकी अंदाजे १० लाख मृत्यू होतील. यात कमी आणि मध्यम उत्पन्न असलेल्या देशांना अधिक फटका बसणार असल्याचे अभ्यासात म्हटले आहे.