कालीचरणांची टीका; सारवासारवीसाठी शिरसाट जरांगेंच्या दरबारात:कालीचरण महाराज म्हणाले होते, जरांगे म्हणजे हिंदुत्वाविरोधातील राक्षस

छत्रपती संभाजीनगर येथील कार्यक्रमात रविवारी कालीचरण महाराज यांनी जरांगे पाटील यांच्यावर टीका केली होती. त्याचे मराठा समाजात तीव्र पडसाद उमटू लागताच महायुतीचे उमेदवार संजय शिरसाट धास्तावले. त्यांनी मंगळवारी सकाळी आंतरवाली सराटीत जरांगे पाटील यांची भेट घेतली. कालिचरण महाराजांचा कार्यक्रम आपण आयोजित केलाच नव्हता, अशी खुलासावजा सारवासारव शिरसाट यांनी केला. रविवारी छत्रपती संभाजीनगर पश्चिम मतदारसंघात हिंदू जनजागरण सभेचे आयोजन करण्यात आले होते. त्यात कालिचरण महाराजांनी थेट जरांगेंवर टीका केल्याने मराठा समाजात नाराजी व्यक्त झाली. त्याचा मतदानावर परिणाम होणार असे लक्षात येताच चिंताक्रांत झालेल्या शिरसाटांनी जरांगे यांची भेट घेऊन स्वत:ची बाजू मांडली. सभा शिरसाटांनीच घेतली : आ. दानवे आता संजय शिरसाट काहीही म्हणत असले तरी ही सभा आयोजित केली होती हे सर्वांनाच माहीत आहे. शिरसाटांचे छत्रपती संभाजीनगर पश्चिम मतदारसंघातील एक प्रमुख पदाधिकारी संजय बारवाल यांनी कालीचरण महाराजांच्या सभेची परवानगी घेतली होती, असे विरोधी पक्षनेते अंबादास दानवे म्हणाले. मी आयोजन केले नव्हते : शिरसाट आंतरवाली सराटी येथे मनोज जरांगे पाटील यांची भेट घेऊन शिरसाट यांनी स्वत:ची बाजू मांडली. त्यानंतर पत्रकारांशी बोलताना त्यांनी असा दावा केला की, कालीचरण महाराजांशी माझा काही संबंध नाही. मी असा कोणताही कार्यक्रम आयोजित केला नव्हता. जरांगेंशी माझी औपचारिक चर्चा झाली. टीका करणाऱ्या त्या वक्तव्याची गरज नव्हती सध्या अनेकजण भेटायला येत आहेत. मला राजकारणापेक्षा मराठा आरक्षण महत्त्वाचे आहे. सत्तेत कुणी आले तरी मराठा समाजाला लढावेच लागणार आहे. आम्ही आता सामूहिक उपोषणाची तयारी करतो आहोत, परंतु त्या बाबांनी असे वक्तव्य करण्याची अजिबात गरज नव्हती. आरक्षणाचा आणि बाबांचा काहीच संबंध नाही. हे बाबांचे काम नाहीच. - मनोज जरांगे पाटील