कित्तूरजवळ कार अपघातात अकोळच्या अधिकाऱ्याचा मृत्यू

महालिंग सदाशिव खुबी (वय ३०), सद्दाम हुसेन जमादार (वय ३२), नरसु विठ्ठल बन्ने (वय २८,रा. तिघेही अकोळ) अशी तिघा जखमींची नावे आहेत. यातील सद्दाम जमादार यांची प्रकृती गंभीर असुन बंगळूरहून परतत असताना (रविवार) सकाळी सहाच्या सुमारास हा अपघात झाला. घटनेची नोंद कित्तूर पोलिसात झाली आहे.

याबाबतची अधिक माहिती अशी की, चिकोडी येथील सहकार निबंधक कार्यालयातील द्वितीय दर्जा अधिकारी अमित शिंदे हे आपले मित्र महालिंग खुबी, सद्दाम जमादार, नरसू बन्ने यांच्यासमवेत मूडबिद्री येथे गेले होते. तेथून ते बंगळूर येथून मूळगावी परतत होते. यावेळी कार अमित शिंदे चालवत होते. त्यांची कार महामार्गावर कित्तूर नजीक आली असता पुढे निघालेल्या ट्रकला कारची मागून धडक बसली. यामध्ये अमितसह इतर तिघेजण गंभीर जखमी झाले. दरम्यान जखमींना तातडीने बेळगाव येथील खासगी रुग्णालयात दाखल केले. दरम्यान उपचारासाठी नेत असताना अमित यांचा वाटेतच मृत्यू झाला.

अपघाताची माहिती मिळतात कित्तूर पोलिस ठाण्याचे उपनिरीक्षक प्रवीण गंगोळ यांनी तातडीने घटनास्थळी भेट देऊन जखमींना उपचारासाठी हलवले. शिवाय मृत व जखमींची ओळख पटवीत नातेवाईकांना पाचारण केले. अपघाताची माहिती मिळतात अकोळ येथील माजी.जि.प.सदस्य चेतन स्वामी, हल्लाप्पा बन्ने, संजय पवार यांच्यासह नातेवाईक व मित्रपरिवार हे तातडीने घटनास्थळी रवाना झाले असून अमीत यांच्या अकाली निधनामुळे अशोक गावावर शोककळा पसरली आहे. त्यांच्या पश्चात पत्नी, एक मुलगा, मुलगी असा परिवार आहे. पुढील तपास उपनिरीक्षक प्रवीण गंगोळ यांनी चालवला आहे.