कृषी प्रक्रिया आधारित रोजगार निर्मिती शेतकरी प्रशिक्षण वर्ग:अनुसूचित जातीतील 30 शेतकऱ्यांनी नोंदवला सहभाग

येथील डॉ. पंजाबराव देशमुख कृषि विद्यापीठ, अखिल भारतीय प्रकल्प - कापणी पश्चात अभियांत्रिकी व तंत्रज्ञान विभागामार्फत अनुसूचित जाती उपयोजने अंतर्गत ३१ जानेवारी रोजी "कृषि प्रक्रियेवर आधारित रोजगार निर्मिती प्रशिक्षण" या कार्यक्रमाचे आयोजन करण्यात आले होते.कार्यक्रमाचे उद्घाटन कृषी अभियांत्रिकी महाविद्यालयाचे अधिष्ठाता डॉ. एस. आर. काळबांडे यांच्या हस्ते झाले. प्रशिक्षणात ३० अनुसूचित जातीतील महिला व पुरुष शेतकऱ्यांनी सहभाग घेतला. कार्यक्रमाचे प्रास्ताविक संशोधन अभियंता डॉ. प्रमोद बकाने यांनी केले. त्यांनी कृषि प्रक्रिया उद्योगाचे महत्त्व स्पष्ट करत प्रशिक्षणात घेतल्या जाणाऱ्या विविध प्रात्यक्षिकांची माहिती दिली. कार्यक्रमाच्या अध्यक्षस्थानी असलेल्या डॉ. एस. आर. काळबांडे यांनी महिला व पुरुष शेतकऱ्यांच्या प्रक्रिया उद्योगातील सहभागाचे कौतुक केले. त्यांनी डॉ. पंजाबराव देशमुख कृषी विद्यापीठाने विकसित केलेल्या जांभूळ व सीताफळ गर निष्कासन यंत्रामुळे या फळपिकांच्या उत्पादनात झालेल्या वाढीचा उल्लेख केला. बंद हंगामात प्रक्रिया केलेला माल विक्रीस ठेवल्यास शेतकऱ्यांना अधिक नफा मिळवता येईल, याबाबत त्यांनी मार्गदर्शन केले. या प्रशिक्षणामध्ये दाल मिल ऑइल मिल बेसन मिल पापड हुरडा मशीनचे प्रात्यक्षिक दाखवण्यात आले प्रशिक्षण कार्यक्रमादरम्यान, कृषि प्रक्रिया उद्योजक नीलेश सिरसाट यांचा अध्यक्षांच्या हस्ते सत्कार करण्यात आला. कार्यक्रमास कृषि अभियांत्रिकी विद्या शाखेतील अधिकारी व कर्मचारी मोठ्या संख्येने उपस्थित होते. कार्यक्रमाचे सूत्रसंचालन डॉ. वासुदेव मते यांनी केले. तसेच कार्यक्रमाच्या यशस्वितेसाठी सहकार्य केलेल्या सर्वांचे आभार मानले. कृषी विद्यापीठात झालेल्या कृषि प्रक्रिया आधारित रोजगार निर्मिती प्रशिक्षण वर्गात प्रशिक्षकांसह सहभागी शेतकरी.