NIMA | 'निमा' अध्यक्षपदावरून सत्तारूढ गटात फूट

३१ डिसेंबर रोजी निमाची वार्षिक सर्वसाधारण सभा पार पडली. सभेत २१ सदस्यांची कार्यकारिणी निवड करण्यात आली. कार्यकारिणी निवडीवर काही सदस्यांनी आक्षेप घेतल्याने, ही निवड प्रक्रिया वादाच्या भोवऱ्यात सापडली होती. तब्बल पावणेतीन तास चाललेल्या या सभेत धनंजय बेळे, निखिल पांचाळ, आशिष नहार, राजेंद्र वडनेरे, व्ही. चंद्रशेखरन, मनीष रावल, किरण वाजे, राजेंद्र अहिरे, अखिल राठी, राजेंद्र कोठावदे, सचिन कंकरेज, कैलास पाटील, नितीन आव्हाड, किरण पाटील, नितीन वागसकर, किशोर राठी, वैभव नागसेठिया, हेमंत खोंड, किरण खाबिया, मितेश पाटील, सुधीर बडगुजर यांची निवड करण्यात आली होती. त्यानंतर अध्यक्ष, सचिव, उपाध्यक्षांसह अन्य पदाधिकाऱ्यांची निवड आठवडाभरात केली जाणार असल्याचे सभास्थळी स्पष्ट केले गेले होते. मात्र, महिना उलटूनदेखील पदाधिकारी निवड केली गेली नसल्याने, निमाचा कारभार विनापदाधिकारी सुरू आहे. दरम्यान, अध्यक्षपदावरून संघर्ष चिघळल्याने पदाधिकारी निवड लांबणीवर पडत असल्याची बाब पुढे आली असून, हा वाद आता चांगलाच चिघळल्याची चर्चा आहे. निवडलेल्या कार्यकारिणीमधील २१ सदस्यांमध्ये दोन गट पडले असून, एका गटाकडून धनंजय बेळे, तर दुसऱ्या गटाकडून आशिष नहार यांचे नाव पुढे करण्यात आले आहे. यातील बहुतांश सदस्यांकडून खांदेपालटाचा आग्रह धरला जात असून, अध्यक्ष बदलासाठी दबावगट निर्माण करण्यात आल्याचे चित्र बघावयास मिळत आहे. दरम्यान, अध्यक्षपदावरून चिघळलेले वातावरण बघता, पदाधिकारी निवडीची सभा नेमकी कधी होणार याकडे उद्योग वर्तुळाचे लक्ष लागून आहे.