गानसरस्वती महोत्सवात अनुपम जोशींना विशेष सन्मान:किशोरी आमोणकर युवा पुरस्काराने गौरव; पं. उल्हास कशाळकरांच्या गायनाने समारोप

पुण्यात सुरू असलेल्या गानसरस्वती महोत्सवाच्या पहिल्या दिवशी युवा सरोदवादक अनुपम जोशी यांना प्रतिष्ठेचा गानसरस्वती किशोरी आमोणकर युवा पुरस्कार प्रदान करण्यात आला. त्यांचे गुरू पं. तेजेंद्र मजुमदार यांच्या उपस्थितीत हा पुरस्कार संपदा बेलवलकर आणि नील बेलवलकर यांच्या हस्ते देण्यात आला. पं. रघुनंदन पणशीकर आणि अपर्णा पणशीकर यांचीही या प्रसंगी उपस्थिती होती. महोत्सवाशी दीर्घकाळ जोडलेले उद्योजक अजित बेलवलकर यांच्या स्मृतिप्रीत्यर्थ यावर्षीपासून हा पुरस्कार सुरू करण्यात आला आहे. रोख २५ हजार रुपये आणि मानपत्र असे या पुरस्काराचे स्वरूप आहे. पुरस्कार स्वीकारताना भारावलेल्या अनुपम जोशी यांनी गुरुजींच्या उपस्थितीत मिळालेल्या या सन्मानाबद्दल कृतज्ञता व्यक्त केली. महोत्सवाच्या पहिल्या दिवसाचा समारोप ज्येष्ठ गायक पं. उल्हास कशाळकर यांच्या गायनाने झाला. त्यांनी राग बिहागडामध्ये 'प्यारी पग होले', 'पाती नवेली' आणि 'सखी मंदिरवा मोरे आये' या तीन बंदिशी सादर केल्या. राग काफी कानडामध्ये 'मोरे घर आये' हा विलंबित तीनतालातील ख्याल आणि 'सावरिया तोरे बिना मोहे' ही द्रुत बंदिश सादर केली. नटकामोद रागातील 'नेवर बाजो' आणि 'साची कहो तुम प्यारे' या रचनांनंतर भैरवीतील 'करन मोरी लागली कन्हैया' या रचनेने त्यांनी आपल्या गायनाची सांगता केली.