चेंबूरमध्ये म्हाडा कॉलनीत आग

चेंबूरच्या भारत नगर भागातील ‘म्हाडा’ कॉलनीमधील सात मजली इमारतीच्या तळमजल्यावर भीषण आग लागल्याची घटना घडली. एका घरात लागलेल्या या आगीवर अग्निशमन दलाने त्वरीत नियंत्रण मिळवल्याने मोठी दुर्घटना टळली असली तरी या दुर्घटनेत एक 60 वर्षीय व्यक्ती जखमी झाली आहे. जखमीवर पालिकेच्या शीव येथील लोकमान्य टिळक रुग्णालयात उपचार सुरू आहेत.

चेंबूर, वाशीनाका येथील म्हाडा कॉलनीमधील इमारत क्रमांक 6मधील तळमजल्यावरील एका घरात बुधवारी रात्री पावणे अकराच्या सुमारास आग लागली. घरातील सिलिंडरचा मुख्य व्हॉल्व्ह आणि रेग्युलेटरमधून गॅस लिकेज झाल्याने ही आग लागल्याची शक्यता आहे. अग्निशमन दलाने तत्काळ घटनास्थळी धाव घेऊन बचावकार्य हाती घेतले.