जीवनाच्या कल्याणासाठी शिव महापुराण- शास्त्री जनक जोशी:असंख्य कलशधारी महिलांसह निघाली शोभायात्रा

संपूर्ण ब्रह्मांडचे अधिपती भगवान शिव असून ते संपूर्ण जीवांचे तारणहार आहेत. सकल जगत कल्याणासाठी शिव आराधना ही अनादी काळापासून होत आहे. यात सहभागी केवळ मनुष्यप्राणीच नव्हे तर त्रैलोक्यातील राक्षस व प्राणीमात्राही येतात. शिव स्तुतीने सद्गती प्राप्त होते. त्यामुळे भक्तांनी सदा शिव आराधना करून जीवन कृतार्थ करण्याच्या दिशेला घेऊन जाण्याचे आवाहन शिव कथाकार शास्त्री जनक जोशी यांनी केले. ते शास्त्री नगर परिसरातील जय अंबे माता संस्थान येथे महाशिवपुराण कथेत मार्गदर्शन करीत होते. यजमान डॉ. तृप्ती भाटिया तथा शिवाय आध्यात्मिक व संशोधन केंद्राच्या वतीने कथेचा श्रीगणेशा झाला. प्रथम सत्रात पू. शास्त्री जनक जोशी यांनी शिवमहापुराण कथेचे मंगलाचरण विषद केले. आपल्या संगीतमय कथेत त्यांनी भगवान शिवाची महिमा प्रतिपादित करत शिव महापुराण स्मरणाने दुःखातून कायमची मुक्ती होत असून यासाठी नित्य शिव महापुराणचे पठण व स्मरण करणे आवश्यक असल्याचेही शास्त्री म्हणाले. कथास्थळी पू. शास्त्री जनक जोशी यांनी कथा प्रारंभ करत मंगलाचरण सादर केले. असे आहेत नित्य कार्यक्रम : महाशिवपुराण कथेत ९ फेब्रुवारीपर्यंत रोज दुपारी २ ते सायंकाळी ५ वाजेपर्यंत शिव महापुराण कथा होणार आहे. त्यानंतर व रोज रात्री ८ वाजता भजन होईल. लाभ घेण्याचे आवाहन जय अंबे माता संस्थान शास्त्री नगर, डॉ. तृप्ती भाटिया व शिवाय अध्यात्मिक व संशोधन केंद्राच्या सेवाधारींकडून करण्यात आले आहे. कथा प्रारंभी परिसरातील वीर हनुमान मंदिरापासून महाशिव पुराण कथेची भगवान शिव देखाव्यासमवेत कलश शोभायात्रा निघाली. असंख्य कलशधारी महिलांसमवेत कथाकार शास्त्री जनक जोशी यांच्या उपस्थितीत यजमान डॉ. तृप्ती भाटिया व मुकेश भाटिया यांनी पूजा अर्चना केली. आतषबाजी व बँड बाज्या समवेत ही शोभायात्रा प्रारंभ झाली. भगवान शिवाचे गीत गात ही कलश शोभायात्रा शास्त्री नगर परिसरात भ्रमण करत जय अंबे माता संस्थान प्रांगणात पोहोचली. याठिकाणी महाआरती सोबत या शोभायात्रेचे भक्तिभावात समापन झाले. यावेळी यात्रेत गोडा कुटुंबासमवेत अनेक संस्था संघटना व कुटुंबांनी शोभायात्रेचे जल्लोषात स्वागत करत शीत पदार्थ, शीतल जल वितरीत करण्यात आले.