ठाकरेंचे निकटवर्तीय सूरजला खिचडी घोटाळ्यामध्ये जामीन:एक वर्षाने तुरुंगातून सुटका हाेताच ‘मातोश्री’वर घेतली धाव

कोरोना काळात मुंबई महापालिकेत झालेल्या कथित खिचडी घोटाळाप्रकरणी आदित्य ठाकरेंचे निकटवर्तीय सूरज चव्हाण यांना १७ जानेवारी २०२४ ईडीने अटक केली होती. मंगळवारी एक वर्षानंतर मुंबई उच्च न्यायालयाने त्यांना एक लाख रुपयांच्या जातमुचलक्यावर जामीन मंजूर केला आहे. त्यामुळे आता त्यांची तुरुंगातून सुटका करण्यात अली. दरम्यान, तुरुंगातून सुटल्यानंतर चव्हाण यांनी थेट मातोश्रीवर जाऊन उद्धव ठाकरेची भेट घेतली. ‘आमचा वाघ इतरांसारखा पळून गेला नाही तर लढला’ अशा शब्दांत आदित्य ठाकरेंनी त्याचे कौतुक केले. कोरोना काळात स्थलांतर करणाऱ्या कामगारांसाठी मनपाने जेवणाची व्यवस्था केली होती. त्यासाठी ५२ कंपन्यांना खिचडीचे कंत्राट दिले होते. चार महिन्यांत ४ कोटी जणांना खिचडी वाटप करण्यात आल्याची माहिती महापालिकेने दिली. मात्र, यात घोटाळा झाल्याचा आरोप भाजप नेते किरीट सोमय्या यांनी केला होता. त्यात आदित्य ठाकरे यांचे निकटवर्तीय सूरज चव्हाण यांचे नाव पुढे आले. माजी खासदार गजानन कीर्तिकर यांचे पुत्र अमोल कीर्तिकर याचीही चौकशी झाली होती. कीर्तिकर यांच्या खात्यात ५२ लाख, तर चव्हाण यांच्या खात्यात ३७ लाख रुपये जमा झाल्याचे समोर आले. मात्र या दोघांनीही या आरोपांना उच्च न्यायालयात आव्हान दिले आहे. त्याची सुनावणी प्रलंबित आहे.