डॉ. द.दि. पुंडे यांना साहित्यदीप जीवन गौरव पुरस्कार:मराठी भाषेच्या विकासासाठी केलेल्या अतुलनीय योगदानाचा सन्मान

साहित्यदीप प्रतिष्ठानतर्फे देण्यात येणारा प्रतिष्ठित साहित्यदीप जीवन गौरव पुरस्कार यंदा ज्येष्ठ साहित्यिक आणि विचारवंत डॉ. द. दि. पुंडे यांना प्रदान करण्यात आला. स्वातंत्र्यवीर सावरकर अध्यासन केंद्रात आयोजित करण्यात आलेल्या विशेष समारंभात डॉ. सुधाकर भोसले यांच्या हस्ते हा पुरस्कार प्रदान करण्यात आला. डॉ. भोसले यांनी आपल्या अध्यक्षीय भाषणात डॉ. पुंडे यांच्या कार्याचा गौरव करताना सांगितले की, त्यांनी भाषा विज्ञानावर प्रचंड ग्रंथसंपदा निर्माण केली आहे. त्यांनी दुर्लक्षित व्यक्तिमत्त्वांवर केलेले विपुल लेखन आणि मराठी भाषेच्या विकासासाठी केलेले कार्य अतुलनीय आहे. कार्यक्रमात प्रसिद्ध लेखिका व कवयित्री डॉ. वर्षा तोडमल, साहित्यदीप प्रतिष्ठानच्या अध्यक्षा ज्योत्स्ना चांदगुडे आणि कार्याध्यक्ष धनंजय तडवळकर यांची प्रमुख उपस्थिती होती. पुरस्काराचे स्वरूप शाल, श्रीफळ, मानचिन्ह आणि मानपत्र असे होते. पुरस्कार स्वीकारताना डॉ. पुंडे यांनी आपल्या भावना व्यक्त करताना सांगितले की, त्यांनी कधीही पुरस्कारांच्या मागे धाव घेतली नाही. त्यांनी एकनिष्ठेने मराठी भाषेसाठी काम केले. त्यांच्या जडणघडणीत त्यांच्या आई-वडिलांचे मोठे योगदान असून, त्यांची आई सहावी शिकलेली असूनही बहुश्रुत होती. त्यांनी मराठी भाषेच्या जागतिक व्याप्तीचा उल्लेख करताना १८५५ साली कराचीमध्ये सापडलेल्या मराठी पोथीचा दाखला दिला.