डोंगर दऱ्यांमध्ये फुलांनी बहरली पळस झाडे:सातपुड्यात लाल गडद, केशरी रंगाची फुले ठरताहेत प्रवाशांचे आकर्षण

नंदुरबार जिल्ह्यातील सातपुड्याच्या पर्वतरांगात सध्या चोहीकडे मोठ्या प्रमाणात पळसाची झाडे फुलांनी बहरली आहेत. लाल गडद व केशरी रंगाच्या फुलांनी बहरलेली ही पळसाची झाडे सध्या डोंगरदऱ्यांतून प्रवास करणाऱ्या प्रवाशांचे लक्ष वेधून घेत आहेत. डोंगराळ भागात तसेच शेत शिवारातील अनेक झाडे ही लगडलेल्या फुलांमुळे शोभून दिसत आहेत. सातपुड्याच्या कुशीत थंडी काही प्रमाणात ओसरायला लागली असून पानगळीने उघडी पडलेली झाडे ही नव्या पालवीचे लेणे अंगावर मिरवायला लागली की वसंत ऋतूची चाहूल लागते. या वसंतात रंगांची उधळण सुरू होते. निसर्गाच्या शिशिर ऋतूत बोडक्या झालेल्या डोंगराला केशरी लाल रंगात न्हाऊ घालणारा पळस बहरला आहे. वसंत ऋतूचे स्वागत करण्यासाठी पळसाची झाडे फुलांनी नटलेली चोहीकडे पहावयास मिळत आहेत. झाडाच्या प्रत्येक फांदीवर लागलेली फुले विस्तवाच्या गोळ्यासारखी लालभडक दिसत आहेत. सर्वदूर अशी म्हण आहे की, कुठेही गेले तरी पळसाला पाने तीनच. पळसाची पाने ही फार उपयोगी आहेत. पूर्वीच्या काळी पळसाच्या पानांपासून मोठ्या पंगतीला जेवण देण्यासाठी द्रोण आणि पत्रावळ्या बनवल्या जायच्या. आता मात्र त्या कालबाह्य ठरल्या . पळसाचे झाड हे डोंगराळ भागात किंवा एखाद्या शेताच्या बांधावर वाढल्याचे दिसून येते. डोंगराळ भागात प्रत्येकाचे लक्ष वेधताना हे झाड सहज दिसते. त्यात बहरात आलेला पळस तर अक्षरशः एखाद्या अग्निज्वाळेसारखा दिसू लागतो. पळसाच्या फुलांमध्ये आयुर्वेदिक गुण आयुर्वेदिक औषधी म्हणूनही या फुलांचा वापर होत असतो. पळसाची फुले पाण्यात टाकून स्नान केले तर त्वचा रोग नाहीसा होतो. त्याचबरोबर पळसाच्या फुलांचा काढा करून पिल्यास किडनीचे विकार दूर होतात. अशी केशरी व लाल गडद रंगाची फुले ही सातपुड्याच्या कुशीत पळसाच्या झाडावर शोभून दिसतात. मार्गाने जाणाऱ्या वाटसरूंना ती आकर्षित करत सातपुड्याच्या वैभवात भर घालत आहे.