तुळशी येथे गूळ, शेंगदाणा, भजीसह हुरड्याचा आस्वाद:करकंब रोटरी क्लबच्या वतीने आयोजित केली हुरडा पार्टी

करकंब रोटरी क्लबच्या सर्व सदस्यांनी माढा तालुक्यातील तुळशी येथे शेतात नुकतीच हुरडा पार्टी आयोजित केली होती. धगधगत्या आगटीत ज्वारीची कणसे भाजली. ताटात वेगवेगळ्या प्रकारच्या चटण्या, गूळ, शेंगदाणे होते. त्याबरोबर गरमागरम हुरडा आला, त्याचा आस्वाद घेतला. गप्पा अन् गाण्यांच्या मैफलीत सारेजणच अगदी चवीनं आणि आनंदाने हुरड्याचा आस्वाद घेत होत. त्याबरोबरच कांदाभजीचा बेतही रंगला. भाजलेली मक्याच्या कणसांमुळे त्यात आणखीन रंगत चढली. जवळपास एक तास हुरडा पार्टीत कसा निघून गेला हे कळले ही नाही. डॉ. प्रशांतकुमार मोरे यांच्या शेतात हुरडा पार्टी रंगली होती. या वेळी करकंब रोटरी क्लबचे अध्यक्ष डॉ. अक्षय मोरे, रघुनाथ जाधव, सचिव शार्दुल शहा, डॉ. प्रशांतकुमार मोरे, रोटरीयन व माजी अध्यक्ष सुनील दुधाणे, धनंजय इदाते, डॉ. सरस्वती मोरे इत्यादी उपस्थित होते. हुरड्याबरोबर मधुर स्वरात गाणी अन् कविता हुरडा पार्टीत रोटरीयन कवी लक्ष्मण जाधव यांनी कविता सादर केल्या. तसेच रसिका शहा यांनी मधुर आवाजात गाणी गायली. तसेच सुनील दुधाणे यांनी विनोद व नकला सादर केल्या. हुरडा पार्टी साठी शेतातील माणसांनी विशेष सहकार्य केले.