पाटील समाजातर्फे संत तुकाराम महाराज जयंती साजरी; काळेंचा सत्कार

जगद्गुरु संत तुकाराम महाराजांच्या जयंती कार्यक्रमाचे आयोजन करण्यात आले होते. प्रारंभी संत तुकाराम यांच्या प्रतिमेचे पूजन करण्यात आले. याप्रसंगी अतिथींच्या हस्ते शिवसेनेचे नवनिर्वाचित जिल्हाप्रमुख मंगेश काळे यांचा शाल व सन्मानचिन्ह देऊन त्यांचा सत्कार करण्यात आला. मराठा समाजातील कोणत्याही व्यक्तीचे कौतुकास्पद कार्य किंवा त्यांची महत्त्वाच्या पदावर नियुक्ती झाल्यास पक्षीय गट तट न ठेवता पाटील समाजाच्यातीने त्या व्यक्तीचा गौरव करण्याचा उपक्रम सुरू केला आहे. या उपक्रमांतर्गत हा पहिला सत्कार घेण्यात आला. अध्यक्षस्थानी पाटील समाजाचे अध्यक्ष अशोक अमानकर होते. प्रमुख अतिथी म्हणून राष्ट्रवादीचे अध्यक्ष संग्राम गावंडे, मराठा समाजाचे ज्येष्ठ नेते देवराव पाटील हागे, मराठा महासंघाचे नेते राम मुळे उपस्थित होते. मराठा समाजाच्या हितासाठी पाटील समाज विविध उपक्रम राबवत असून समाजाचे हित साधणाऱ्या प्रत्येक योजनेत अथवा कार्यक्रमात मी आघाडीवर राहून सहकार्य करेन, अशी ग्वाही काळे यांनी दिली. कार्यक्रमात मराठा समाजाचे दिवंगत नेते बलदेवराव पाटील यांना श्रद्धांजली अर्पण करण्यात आली. कार्यक्रमाला राजेंद्र मोहोकार, सुनील जानोरकर, विजय बोरकर, वासुदेवराव कडू, पंकज जायले, पंकज साबळे, डॉ. सुधीर ढोणे आदी उपस्थित होते. प्रास्ताविक, सूत्रसंचालन व आभार प्रदर्शन पाटील समाजाचे सचिव प्रदीप खाडे यांनी केले. कर्तृत्ववान युवकांची आवश्यकता आज कर्तृत्ववान युवा पिढीची समाजात गरज आहे. समाजातील अशा कर्तृत्ववान युवकांनी एकत्रित येऊन एक बळकट संघटन तयार केले पाहिजे, असे अध्यक्ष अशोक अमानकर म्हणाले. समाजातील मोठी मार्गदर्शक मंडळी व युवकांनी राजकीय गटातटास तिलांजली देऊन समाज हित जोपासण्याचा प्रयत्न करावा, असे संग्राम गावंडे म्हणाले. पक्ष कोणताही असो, त्यात कार्यरत असणाऱ्यांनी शेतकऱ्यांचे हित जोपासण्याचा प्रयत्न करावा, असे शेतकरी जागर मंचाचे संयोजक प्रशांत गावंडे म्हणाले.